Knattspyrnumaðurinn Albert Guðmundsson segir samskipti sín við Arnar Þór Viðarsson, fyrrverandi landsliðsþjálfara Íslands, hafa verið erfið og að á endanum hafi hann ákveðið að gefa ekki kost á sér í landsliðið á meðan Arnar væri við stjórnvölinn.

Hann greinir frá þessu í viðtali við RÚV.

Albert segir að hann hafi byrjað flesta leiki undir stjórn Arnars en hvorki honum sjálfum né íslenska landsliðinu hafi gengið sem skyldi. Hann hafi því sjálfur óskað eftir samtali við þjálfarann og lýst þeirri skoðun sinni að Arnar væri ekki að ná því besta út úr honum.

Að sögn Alberts taldi hann samtalið hafa verið gott og uppbyggilegt. Framhaldið hafi hins vegar komið honum á óvart. Eftir fundinn hafi hann misst sæti sitt í byrjunarliðinu og jafnframt upplifað að Arnar talaði með neikvæðum hætti um hann í fjölmiðlum.

Samskipti þeirra versnuðu enn frekar þegar Albert eignaðist dóttur. Hún var aðeins tveggja vikna gömul þegar næsta landsliðsverkefni stóð fyrir dyrum og ákvað Albert að gefa ekki kost á sér. Hann vildi verja tímanum með nýfæddri dóttur sinni frekar en að fara í landsliðsverkefnið og eiga á hættu að sitja á varamannabekknum.

Albert var ósáttur við hvernig Arnar útskýrði fjarveru hans opinberlega. Honum fannst gefið í skyn að hann hefði aðeins verið tilbúinn að mæta til landsliðsverkefna ef honum væri tryggður spiltími.

Þar hafi mælirinn verið fullur hjá Albert. Í kjölfarið tók hann þá ákvörðun að hann myndi ekki spila fyrir íslenska landsliðið á meðan Arnar Þór væri landsliðsþjálfari.