Óvenjulegur gestur lét sjá sig á bókasafni í Kaliforníu í Bandaríkjunum á miðvikudagsmorgun þegar björn gekk þar inn og gerði sér lítið fyrir og fékk sér meðal annars hunang.

Atvikið átti sér stað á bókasafni í Mammoth Lakes í Mono-sýslu um klukkan sex að morgni. Dagsetningin vakti sérstaka athygli þar sem þá voru liðin 100 ár frá því að Bangsímon, hinn heimsþekkti björn úr verkum A.A. Milne, kom fyrst fram.

Myndband af heimsókninni var birt á samfélagsmiðlum bókasafnsins. Þar kom fram að björninn hefði gengið beint að matarbirgðum starfsfólks.

Hann lét ekki hunangið eitt duga heldur fékk sér einnig hnetusmjör, ferskjur og smákökur. Að því loknu virðist hann hafa skoðað sig lítillega um meðal bókahillanna áður en hann yfirgaf bygginguna af sjálfsdáðum.

Þrátt fyrir óvænta heimsókn varð ekkert tjón á bókasafninu. Engar hillur féllu og engar bækur skemmdust.

Hunangskrukkan var hins vegar enn ófundin þegar bókasafnið greindi frá málinu.