Orka ehf. hefur höfðað mál gegn fyrirtæki og krefst greiðslu á tæplega 1,5 milljónum króna vegna reikninga sem sagðir eru ógreiddir en greint er frá stefnunni í Lögbirtingablaðinu.
Samkvæmt stefnu málsins nemur höfuðstóll kröfunnar 1.469.137 krónum. Auk þess er krafist dráttarvaxta frá 16. júní 2026 til greiðsludags og málskostnaðar samkvæmt mati dómsins.
Í stefnunni kemur fram að Orka sérhæfi sig meðal annars í innflutningi, heildsölu og smásölu á bifreiðum, bifreiðahlutum og tengdum varningi. Viðskiptasamband hafi stofnast milli fyrirtækjanna þegar stefnda félagið óskaði eftir þjónustu Orku.
Krafan er sögð vegna kaupa á könnuþvottavél fyrir sprautubyssur í bílamálun og tveimur vegghengdum þvottakerfum í júní. Reikningarnir tveir voru að fjárhæð 775.335 krónur og 693.802 krónur og voru báðir gefnir út 16. júní.
Orka segir reikningana ekki hafa fengist greidda þrátt fyrir ítrekaðar innheimtutilraunir og hafi því verið nauðsynlegt að höfða mál til greiðslu skuldarinnar.
Málið verður þingfest í Héraðsdómi Reykjavíkur í nóvember.
