Albert Guðmundsson er án nokkurs vafa einn af hæfileikaríkustu knattspyrnumönnum Íslands á þessari öld. Þrátt fyrir augljósa knattspyrnusnilli hafa önnur mál í kringum Albert vakið mikla athygli hérlendis og erlendis. Hann var meðal annars ákærður fyrir nauðgun og hafa reynslumiklir knattspyrnumenn sett út á hugarfar hans.
Með fótbolta í blóðinu
Albert Guðmundsson fæddist í Reykjavík 15. júní árið 1997. Foreldrar Alberts eru Guðmundur Benediktsson og Kristbjörg Ingadóttir og eru þau bæði fyrrverandi landsliðsmenn í knattspyrnu. Þá er afi Alberts, hann Ingi Björg Albertsson, einn besti sóknarmaður sem hefur spilað á Íslandi. Langafi Alberts er svo Albert Guðmundsson en hann spilaði meðal annars fyrir stórliðin Arsenal og AC Milan og varð síðar fjármálaráðherra Íslands.
Frábært gengi með félagsliðum
Snemma í yngri flokkum var ljóst að Albert væri hæfileikaríkur knattspyrnumaður en hann spilaði með KR þar til hann gekk til liðs við hollenska liðið Heerenveen aðeins 16 ára gamall. Hann hafði á undan því farið tvisvar sinnum í reynslu til enska stórliðsins Arsenal, rétt eins og langafi hans.
„Hann getur lært heilmikið hér. Ef hann hefur sömu hæfileika og hugsun og pabbi sinn þá á hann alla möguleika á að ná langt.“
Árið 2015 gekk hann svo til liðs við hollenska stórliðið PSV. Albert varð fljótt einn af mikilvægustu leikmönnum varaliðs PSV en náði aldrei að festa sig í sessi í aðalliði PSV. Árið 2018 skipti Albert svo í hollenska liðið AZ Alkmaar þar sem hann blómstraði og var snöggur að komast í byrjunarliðið.
En þó að Alberti hafi gengið vel með félagsliði sínu þá átti hann sína gagnrýnendur. Ronald de Boer, fyrrverandi landsliðsmaður Hollands, gagnrýndi hann harðlega eftir að Albert mætti í viðtal eftir leik með demants eyrnalokka. „Ég veit ekki hvort þið tókuð eftir því en hann var búinn að setja á sig tvo demants eyrnalokka. Hann fór inn í búningsklefa til að setja á sig eyrnalokka án þess að fara í sturtu,“ sagði De Boer sem var einnig ósáttur að Albert, sem hann hafði þá búið í Hollandi i tæpan áratug, hafi talað ensku í viðtalinu.
„Hann talar ekki hollensku eftir sjö ár. Það segir sitt um hugarfarið í þessum strák. Ég hef það á tilfinningunni að hann sé upptekinn af öðrum hlutum. Ég fór sjálfur í viðtal á spænsku eftir fjóra mánuði hjá Barcelona.“
Albert var svona keyptur til ítalska liðsins Genoa, sem féll úr efstu deild stuttu síðar, í janúar 2022. Albert varð fljótt einn af bestu leikmönnum liðsins og fór að vekja athygli stórliða bæði á Ítalíu og Englandi. Lið á borð við Inter Milan, Tottenham og Napoli íhuguðu öll að kaupa Albert en það var svo Fiorentina sem fékk hann á lánssamningi sumarið 2024. Liðið keypti svo Albert að lokum eftir miklar vangaveltur en Everton á Englandi og Inter Milan á Ítalíu höfðu einnig áhuga á að kaupa hann þegar því tímabili lauk.
Albert færði sig aftur um set á Ítalíu í september 2026 og gekk til liðs við Lazio á lánssamningi og skoraði skallamark í fyrsta leik sínum.
„Sparileikmaður“ með landsliðinu
Góður árangur Alberts með félagsliðum og sýnilegir hæfileikar hans hafa þó ekki náð að skila sér í íslenska landsliðið en flestir eru á því að Albert hafi aldrei náð að skína með því á sama hátt og hann hefur gert með félagsliðum þrátt fyrir að hafa fengið ótal tækifæri en hann spilaði sinn fyrsta leik árið 2017 og fór með Íslandi á HM í Rússlandi árið 2018. Þá hefur hugarfar hans og metnaður með landsliðinu verið gagnrýnt og stundum verið kallaður „sparileikmaður“ af stuðningsmönnum Íslands.
Albert komst svo heldur betur í fréttirnar árið 2022 þegar hann var ekki valinn í landsliðið af Arnari Þór Viðarssyni, þáverandi landsliðsþjálfara.
„Ég var mjög óánægður og svekktur með hugarfar Alberts.”
Albert var aldrei valinn aftur í landsliðið meðan Arnar var landsliðsþjálfari. Hann snéri aftur í hópinn þegar hinn norski Åge Hareide tók við starfinu sem landsliðsþjálfari. Þá náði hann loksins að sýna hæfileika sína þegar Ísland náði næstum að tryggja sér sæti á EM í knattspyrnu en Albert skoraði í fjögur mörk í leikjum gegn Úkraínu og Ísrael.
Ákærður fyrir nauðgun
Einkalíf Alberts varð svo að einu heitasta umræðuefni Íslands þegar hann var kærður fyrir nauðgun í ágúst 2023. Vegna reglna KSÍ mátti Albert ekki keppa fyrir hönd Íslands þar til málinu lauk. Það hafði þó ekki nein áhrif á stöðu hans hjá Genoa á Ítalíu en félagið stóð þétt við bak Alberts.
Málið var látið niður falla og nýtti KSÍ tækifæri og valdi Albert í landsliðshópinn sem mætti Ísrael og Úkraínu. Niðurfellingunni var hins vegar áfrýjað en KSÍ ákvað að halda Alberti í hópnum þrátt fyrir að slíkt væri brot á reglum sambandsins. KSÍ bar fyrir sig óskýru orðalagi í eigin reglum og sagði að Albert hafi ekki sætt rannsókn á þeim tímapunkti sem hann var valinn í hópinn.
„Ég er sannfærður um að réttlætnu verði fullnægt, því ég er saklaus.“
Eftir að málinu var áfrýjað var ákveðið að landsliðsmaðurinn yrði ákærður fyrir nauðgun. Hann var að lokum sýknaður í október 2024 en dómarinn mat framburð Alberts trúverðugri en framburð konunnar. Þá er hún sögð hafa verið margsaga í framburði sínum en Albert neitaði ávallt sök í málinu.
Albert var á endanum naumlega sýknaður í Landsrétti en einn af þremur dómurum vildi dæma Albert í fangelsi.
Stuttu eftir að Albert var ákærður greindu fjölmiðlar frá því að þau Guðlaug Elísa Jóhannsdóttir, barnsmóðir hans, væru hætt saman.
Uppfært 8. september 2026
