Golfklúbburinn Keilir vekur athygli á áskorunum sem vallarstarfsmenn mæta eftir vetur og skemmdum sem urðu á Hvaleyrarvelli í vetur, í færslu sem birt var á dögunum.
Í færslunni segir að veturinn hafi ekki farið vel með völlinn og að einnig hafi verið ekið um svæðið á torfæruhjóli:
„Því miður í vetur fór inná völlinn okkar eflaust ungur og efnilegur samborgari okkar á krossara og tætti upp 17. flötina.“
Fram kemur að skemmdirnar hafi verið verulegar.
„Einsog sést á myndunum þá urðu talsverðar skemmdir eftir þennan aðila, mikið lagði viðkomandi á sig og spólaði í gegnum 17. flötina þannig að stór sá á.“
Þrátt fyrir þetta segir klúbburinn að viðgerðir hafi gengið vel:
„Enn örvæntum ekki Rúnar okkar allrabesti hefur eytt fjölmörgum tímum í að laga flötina og verður hún í fínu lagi.“
Jafnframt er tilmælum beint til foreldra í færslunni:
„Foreldrar þið sem gefið krökkunum þessi fínu hjól vinsamlegast biðjið þau um að halda sér fjarri golfvellinum.“
Lykilhlutverk vallarstarfsmanna
Í færslunni er einnig fjallað um álag á glompur vegna leysinga og að unnið hafi verið að því að bæta ástand þeirra. Þá segir að undirbúningur fyrir opnun vallarins sé í fullum gangi og að starfsfólk vinni langan vinnudag:
„Nú er lokaundirbúningur í hámæli fyrir opnun, vallarstarfsmenn vinna dag og nótt og þegar þetta er skrifað eru allir starfsmenn mættir til vinnu núna 1. maí.“
Klúbburinn segir einnig að á síðustu árum hafi verið lögð mikil áhersla á endurbætur á brautum:
„Mikil áhersla hefur verið lögð á endurheimt brauta í hrauninu síðustu 3 ár. Við erum heldur betur farin að sjá árangur af þeirri vinnu.“
Í lok færslunnar er lögð áhersla á mikilvægi starfs vallarstarfsmanna og framlag þeirra til golfíþróttarinnar
„Vallarstarfsmenn golfvalla okkar gegna lykilhlutverki í því að skapa þá upplifun sem við kylfingarnir njótum á hverjum degi.“
Þá segir einnig:
„Á 1. maí, degi verkafólks, er tilefni til að minnast mikilvægs framlags þeirra.“
Færslunni lýkur með þökkum til starfsfólks:
„Gleðilegan verkalýðsdag! Takk vallarstarfsmenn!“
Komment