Íslenski landsliðsmaðurinn Mikael Neville Anderson varð fyrir kynþáttaníði þegar AGF mætti Silkeborg í dönsku úrvalsdeildinni í knattspyrnu um síðustu helgi.

Midtjyllands Avis greinir frá því að stuðningsmenn Silkeborgar hafi beint kynþáttaníði að Mikael þegar hann tók hornspyrnu. Leiknum lauk með 2:2-jafntefli.

Málið hefur verið tilkynnt til aga- og úrskurðarnefndar danska knattspyrnusambandsins.

Kent Madsen, framkvæmdastjóri Silkeborgar, staðfestir að tilkynning hafi borist og segir félagið fordæma kynþáttaníð alfarið.

Hann segir að komist nefndin að þeirri niðurstöðu að atvikið hafi átt sér stað megi félagið eiga von á sekt. Niðurstaða málsins liggur ekki fyrir og er það nú til meðferðar hjá nefndinni.