Ísraelska knattspyrnusambandið hefur svarað ummælum Heimis Hallgrímssonar, landsliðsþjálfara Írlands, af hörku og sakar hann um heimsku, fáfræði og hræsni. Ummælin falla í aðdraganda tveggja umdeildra leikja Írlands og Ísraels í Þjóðadeildinni.
Írland hefur leik í Þjóðadeildinni gegn Kosovo í Pristina á fimmtudag en fram undan eru einnig tveir leikir gegn Ísrael.
Mikil umræða hefur verið á Írlandi um leikina vegna þjóðarmorðsins á Gaza og hafa komið fram kröfur um að írska landsliðið sniðgangi viðureignirnar. Á aukaaðalfundi írska knattspyrnusambandsins, FAI, í júlí var hins vegar samþykkt tillaga um að leikirnir skyldu fara fram.
Heimir ræddi stöðuna þegar hann tilkynnti landsliðshóp sinn í síðustu viku. Hann sagði suma leikmenn óþægilega með tilhugsunina um að mæta Ísrael en að sú staðreynd að þeir hefðu þegið landsliðsboðið sýndi sterkan liðsanda.
Þegar Heimir var spurður hvernig gengi að halda einbeitingu leikmanna við knattspyrnuna í aðdraganda leikjanna svaraði hann:
„Ég hef sagt það áður, við erum ekki að spila með þjóðarmorði, við erum að spila gegn þjóðarmorði. Við erum að spila gegn Ísrael, við erum ekki að spila með Ísrael.“
Ummælin hafa vakið hörð viðbrögð í Ísrael. Ísraelska knattspyrnusambandið birti yfirlýsingu á opinberum Twitter-reikningi sínum þar sem Heimir var gagnrýndur persónulega.
„Við höfum lagt okkar af mörkum til heimsins og mannkynsins á ótal sviðum og unnið til glæsilegs fjölda Nóbelsverðlauna í leiðinni. Því miður höfum við ekki enn fundið lækningu við heimsku, fáfræði og hræsni sem þjálfari @IrelandFootball sýnir,“ sagði meðal annars í yfirlýsingunni.
Sambandið sneri síðan orðum Heimis gegn honum og bætti við:
„Við erum ekki að spila með fáfræði, hræsni og heimsku. Við erum að spila gegn þjálfaranum sem holdgerir þetta.“
Samkvæmt írskum fjölmiðlum hefur ísraelska knattspyrnusambandið jafnframt haft til skoðunar að leggja fram formlega kvörtun til UEFA vegna ummæla Heimis.
Í september komst óháð rannsóknarnefnd Sameinuðu þjóðanna að þeirri niðurstöðu að Ísrael hefði framið og héldi áfram að fremja þjóðarmorð gegn Palestínumönnum á Gaza. Ísraelsk stjórnvöld hafa hafnað þeirri niðurstöðu.
Þrátt fyrir þrýsting um að sniðganga leikina hefur FAI ákveðið að halda sig við þá ákvörðun að landsliðið mæti Ísrael. Ummæli Heimis og hörð viðbrögð ísraelska sambandsins hafa nú aukið enn frekar á spennuna fyrir leikina tvo.
