Ísraelski framherjinn Saied Abu Farchi var rekinn af velli eftir markafagn í 3:1-tapi Ísraels gegn Austurríki í Þjóðadeild UEFA í gær.

Abu Farchi, sem er tvítugur, jafnaði metin fyrir Ísrael á 55. mínútu með skalla eftir að Austurríki hafði komist yfir úr vítaspyrnu Romano Schmid fyrir leikhlé.

Eftir markið hljóp Abu Farchi að hornfánanum, greip hann og féll á annað hné og virtist þykjast skjóta úr honum áður en hann hélt áfram fagninu. Leikmaðurinn fullyrðir hinsvegar á samfélagsmiðlum að hann hafi verið að herma eftir snókerskoti.

Dómarinn hafði gefið Abu Farchi gult spjald fjórum mínútum fyrr og mat fagnaðarlætin sem tilefni annars gula spjalds. Ísrael lék því síðasta hluta leiksins manni færri.

Austurríki nýtti sér liðsmuninn og komst aftur yfir á 90. mínútu þegar Phillipp Mwene skoraði eftir fyrirgjöf Paul Wanner. Sasa Kalajdzic bætti síðan við þriðja markinu í uppbótartíma.

Landsliðsþjálfari Ísraels, Ran Ben Shimon, sagði við austurríska fjölmiðla að Abu Farchi fagnaði öllum mörkum sínum með þessum hætti.

„Þið getið sannreynt það. Kannski var það mín sök að hafa ekki sagt honum að hann yrði að hætta þessu. Hann þarf að læra af þessu. Þetta er líka stór lexía fyrir okkur,“ sagði Ben Shimon.

Í öðrum leikjum Þjóðadeildarinnar tapaði Írland 1:0 fyrir Kósóvó í Pristina. Undirbúningur leiksins einkenndist af umræðum um komandi viðureign Íra gegn Ísrael, en landsliðsþjálfarinn Heimir Hallgrímsson hafði áður viðurkennt að margir leikmenn liðsins væru óánægðir með að þurfa að spila þann leik.

Í A-deild sigraði Noregur Danmörku 3:2 í Ósló þar sem Erling Braut Haaland skoraði tvö mörk, þar á meðal sigurmarkið á 74. mínútu. Þá vann Grikkland dramatískan 2:1-sigur á Serbíu með sigurmarki Tasos Douvikas í uppbótartíma, Malta lagði Andorra 2:1 og Litháen vann Liechtenstein 2:0.