Ragnar Agnarsson, fyrrverandi forstjóri og einn eigenda SagaFilm, segir krabbameinsgreiningu hafa gjörbreytt sýn sinni á lífið og kennt sér að lifa upp á nýtt. Ragnar er nýjasti gestur hlaðvarps Sölva Tryggvasonar þar sem hann ræðir opinskátt um veikindin, erfiðar meðferðir og þá lífsreynslu sem fylgdi í kjölfarið.
Ragnar segir breytingar á lífssýn sinni hafa hafist nokkrum árum áður en hann greindist. Árið 2019 fór hann meðal annars í Ayahuasca ferð til Perú, sem hann lýsir sem ákveðnum vendipunkti. Upphaflega hafi ætlunin verið að verða betri í viðskiptum og að afla tekna, en upplifunin hafi orðið allt önnur og ýtt honum út í mikla sjálfsskoðun.
Stærsti vendipunkturinn kom þó þegar Ragnar greindist með krabbamein. Hann hafði fundið fyrir óþægindum í hálsi og leitaði til læknis án þess að gera ráð fyrir að eitthvað alvarlegt væri að. Í kjölfar rannsókna fékk hann þær fréttir að um krabbamein væri að ræða.
Ragnar segir greininguna hafa orðið til þess að hann endurmeti líf sitt frá grunni. Hann hafi áttað sig á því að hann hefði um árabil verið á stöðugri ferð án þess að staldra við og njóta augnabliksins.
„Því miður þurfti ég krabbamein til að átta mig. En núna get ég sannarlega sagt að þetta krabbamein er það besta sem hefur komið fyrir mig.“
Við tók mjög krefjandi meðferðarferli. Ragnar fór í 36 geislameðferðir á hálsi auk sex lyfjameðferða. Hann segir íslenska heilbrigðiskerfið hafa tekið einstaklega vel á móti sér og að hann hafi ákveðið að treysta hefðbundnum krabbameinsmeðferðum. Samhliða þeim segist hann hafa notað THC og kannabisolíu til að lina verki og bæta matarlyst og svefn, auk þess sem hann hafi tekið Ayahuasca í smáskömmtum.
Meðferðirnar reyndust honum afar erfiðar og segist Ragnar á tímabili hafa íhugað að hætta baráttunni. Umhyggja heilbrigðisstarfsfólks hafi hins vegar haft djúpstæð áhrif á hann og styrkt ákvörðun hans um að halda áfram.
Í dag segist Ragnar fyrst og fremst finna fyrir miklu þakklæti. Hann líti svo á að veikindin hafi neytt hann til að staldra við, kynnast sjálfum sér betur og endurmeta hvað skipti raunverulega máli í lífinu.
