Þorgrímur Þráinsson, rithöfundur og fyrrverandi knattspyrnumaður, gagnrýnir upphæð verðlaunafjár sem veitt er fyrir sigur í bikarkeppni karla í knattspyrnu hér á landi.

Breiðablik varð í gær bikarmeistari í annað sinn í sögu félagsins eftir 2-1 sigur á Aftureldingu í úrslitaleik á Laugardalsvelli. Að leik loknum tóku leikmenn Breiðabliks við bikarnum auk ávísunar að fjárhæð ein milljón króna. Afturelding fékk 500 þúsund krónur fyrir annað sætið.

Þorgrímur, sem varð tvívegis bikarmeistari með Val á sínum knattspyrnuferli, vakti athygli á verðlaunafénu í færslu á Facebook. Þar óskaði hann Breiðabliki til hamingju en sagði upphæðina vekja furðu.

„Ef ég man rétt er það sama upphæð og við í Val fengum þegar við urðum Mjólkurbikarmeistarar á mínu síðasta ári – 1990. Síðan eru liðin 36 ár.“

Þorgrímur spurði hvort ekki væri tímabært að tífalda verðlaunaféð eða finna nýjan styrktaraðila fyrir keppnina.