Jafnaðarmaðurinn Guðmundur Ari Sigurjónsson skaraði fram úr á heimavelli þegar hann tók þátt í Neshlaupinu á Seltjarnarnesi um helgina. Guðmundur Ari var áður oddviti Samfylkingarinnar á Nesinu og náði framúrskarandi árangri í síðustu sveitarstjórnarkosningum sem fleytti honum áfram í landsmálin og á Alþingi með Kristrúnarbylgjunni.

Í þetta skiptið sótti hann gullverðlaun í hlaupi og stærði sig af því á samfélagsmiðlum með mynd, hvar hann beit í medalíuna og kvað við: „Gott að sækja sigra á Nesinu.“

Guðmundi, sem er 37 ára gamall, hafði þannig tekist að slá við níu ára gömlum dreng sem kom á hælum honum í öðru sæti, en eins og sést á úrslitum ríflega þriggja kílómetra hlaupsins voru fullorðnir þátttakendur almennt í fylgd barna sinna og komu á sama tíma og börnin í mark.

Slíkt hlaup er gjarnan nefnt skemmtiskokk. Þingmaðurinn sprettharði hafði þó ekki stigið létt til jarðar í aðdraganda hlaupsins. Í viðtali við Vísi eftir hlaupið sagðist hann einsett sér að ná hraðanum 4.20, sem þýðir að hlaupa hvern kílómetra á fjórum mínútum og tuttugu sekúndum. Hefði hann tekið þátt í fullorðinshlaupinu, sem var tvöfalt lengra, og haldið sama hraða, hefði hann hafnað í 18. sæti af 84.

Guðmundur Ari sigraði þó ekki skemmtiskokkið í heild sinni, heldur aðeins í karlaflokki, því tvær 12 og 14 ára stúlkur voru á undan honum í mark. Því er svigrúm fyrir bætingu að ári.