41 árs kona fékk heldur betur óvæntar fréttir þegar hún komst að því að hún væri ólétt aðeins nokkrum klukkustundum áður en hún eignaðist son.
Konan, Sammy, hafði fundið fyrir óþægindum í kvið og taldi sjálf að um gæti verið að ræða kviðslit eða tognun eftir reglulegar kviðæfingar. Eftir skoðun tveggja lækna kom hins vegar upp grunur um að hún gæti verið barnshafandi.
Samkvæmt breska dagblaðinu Mirror hafði Sammy ekki haft blæðingar í nokkra mánuði en taldi það tengjast breytingaskeiði. Hún hafði jafnframt misst mikið í þyngd eftir magabandsaðgerð og því hafði lítið sem ekkert sést á henni að hún gengi með barn.
Fyrsta þungunarprófið á læknastofunni reyndist neikvætt en annar læknir taldi sig sjá daufa línu á prófinu og ráðlagði henni að taka annað próf heima. Það reyndist jákvætt.
Sammy gerði sér þó enn enga grein fyrir því að meðgangan væri komin svo langt.
Fór á bráðamóttöku vegna krampa
Síðar sama kvöld fékk Sammy krampa í kviðinn og leitaði á bráðamóttöku. Þar var gerð ómskoðun og kom fljótlega í ljós að barn var í móðurkviði.
„Hann gerði ómskoðunina og byrjaði að segja: „Þarna er fótleggur. Þarna er handleggur. Þarna er bakið,““ sagði Sammy um augnablikið þegar læknir skoðaði hana.
Um klukkan sjö morguninn eftir sendi hún Triston McKend, 38 ára sambýlismanni sínum, skilaboð og sagði honum að hún væri ólétt.
Sammy taldi fyrst að hún gæti verið skammt komin á leið og óttaðist jafnvel að hún væri að missa fóstrið. Starfsfólk sjúkrahússins færði henni hins vegar enn óvæntari tíðindi.
„Svo kom önnur kona inn og sagði: „Þú ert komin af stað í fæðingu.“ Ég sagði: „Fyrirgefðu, nei, það getur ekki verið.“ Hún svaraði: „Jú, barnið er að koma.““
Sonurinn fæddist fimm tímum síðar
Aðeins fimm klukkustundum eftir að Sammy kom á sjúkrahúsið fæddi hún heilbrigðan dreng, Noah, sem vó rúmlega 3,6 kíló.
Hún segir að það hafi tekið tíma að átta sig á því sem hafði gerst og að tengslin við barnið hafi ekki myndast samstundis vegna þess hve skyndilega hann kom inn í líf hennar.
„Ég hugsaði eiginlega bara: Guð minn góður, er hann raunverulegur? Ég gat ekki meðtekið þetta,“ sagði hún.
Sammy telur mikið þyngdartap eftir magabandsaðgerð hafa átt þátt í því að meðgangan uppgötvaðist ekki. Hún hafði misst um 63 kíló og segir þyngd sína aðeins hafa aukist um rúmt kíló frá því í maí þar til hún fæddi.
Hún hafði auk þess verið mjög virk alla meðgönguna. Hún fór meðal annars á tónleika, spilaði fótbolta, fór í fjögurra klukkustunda hjólaferð og tók þátt í vatnsleikfimi aðeins tólf klukkustundum áður en fæðingin hófst.
Triston hyggst nú flytja tímabundið til Bournemouth til að aðstoða Sammy við umönnun Noahs, sem kom foreldrum sínum svo sannarlega á óvart.
