Nærri átta mánuðum eftir að Martin Short staðfesti að dóttir hans, Katherine Short, hefði látist af völdum sjálfsvígs, 42 ára að aldri, ræddi leikarinn um þá þungu byrði sem fylgir því að takast á við geðrænan vanda. Katherine var dóttir Martins og eiginkonu hans heitinnar, Nancy Dolman.

Martin líkti baráttu Nancy við krabbamein við geðrænan vanda dóttur þeirra þegar hann ávarpaði gesti á góðgerðarsamkomu Rare Impact Fund, sem Selena Gomez stendur að, þann 14. október. Hann sagði að um væri að ræða „tvo sjúkdóma“.

„Stundum eru sjúkdómar banvænir,“ sagði hann í ræðu sinni.

„Katherine barðist svo lengi við alvarlegan geðrænan vanda, þar á meðal jaðarpersónuleikaröskun og fleira. Hún gerði sitt besta þar til hún gat það ekki lengur.“

Martin, sem leikur í þáttunum Only Murders in the Building, hrósaði Selena Gomez, sem einnig leikur í þáttunum, fyrir að afla fjár og vekja athygli á verkefnum sem tengjast geðheilbrigði. Markmiðið væri að hjálpa fólki að skilja að geðrænn vandi væri einfaldlega sjúkdómur sem ætti ekki að fela eða líta á sem skömm fyrir fjölskylduna.

Hann ræddi einnig sorgina sem hann hefur þurft að takast á við á þessum erfiða tíma og vitnaði í hina látnu söngkonu Dolly Parton.

„Missirinn mun valda sál minni óbærilegum sársauka svo lengi sem ég lifi,“ sagði hann.

„Hin stórkostlega Dolly Parton sagði eitt sinn: „Sorg er ást sem á hvergi höfði sínu að halla.“ Sársaukinn við að missa dóttur mína mun alltaf búa í hjarta mínu. Ég held að það sé einfaldlega vegna þess að það sem við elskum innilega getum við aldrei misst.“

Missti eiginkonuna 2010

Í viðtali við CBS News rifjaði hann upp síðustu orð eiginkonu sinnar áður en hún lést árið 2010.

„Síðustu orð Nan til mín voru: „Martin, leyfðu mér að fara“,“ sagði hann og bætti við um dóttur sína: „Og það sem hún var í raun að segja var: „Pabbi, leyfðu mér að fara“.“

Í yfirlýsingu sem talsmaður fjölskyldunnar sendi E! News þann 24. febrúar sagði fjölskyldan að hún væri „miður sín vegna þessa missis“ og óskaði eftir friði og næði á þessum erfiða tíma.

„Katherine var öllum kær og verður minnst fyrir birtuna og gleðina sem hún færði heiminum,“ sagði jafnframt í yfirlýsingunni.

Katherine var elst þriggja barna Martins og Nancy. Bræður hennar eru Oliver Short, 39 ára, og Henry Short, 36 ára.

Þótt báðir foreldrar hennar störfuðu í skemmtanaiðnaðinum valdi Katherine sér annan starfsvettvang. Hún var löggiltur félagsráðgjafi með sérhæfingu í klínískri félagsráðgjöf.

Hún lauk BA-prófi í sálfræði og kynjafræði við New York University árið 2006 og meistaraprófi í félagsráðgjöf frá University of Southern California árið 2010.

Martin, sem er þekktur fyrir störf sín sem grínisti og leikari, hefur áður rætt opinskátt um hvernig hann tekst á við sorg. Hann missti einnig bróður sinn, David Short, árið 1962.

Í endurminningabók sinni, I Must Say: My Life As a Humble Comedy Legend, sem kom út árið 2014, skrifaði hann:

„Ég þoli ekki þegar talað er um látna í hálfum hljóðum eða þegar þeim er úthýst úr hugsunum okkar.“

Leikarinn hefur sagt að hann leiti stöðugt leiða til að minnast þeirra sem hann hefur misst, sérstaklega eiginkonu sinnar, Nancy.

„Nancy hefur aðeins gengið inn í næsta herbergi,“ sagði Martin.

„Þess vegna, sum kvöld þegar ég sakna hennar virkilega, fæ ég mér romm og kók í rökkurbyrjun og sest í sófann á veröndinni fyrir framan húsið okkar eða uppi á svölunum við svefnherbergið, þar sem ég sé yfir Kyrrahafið. Ég kalla þá: „Hey, Nan!“ Það er einfaldlega gott að finna orðin myndast í hálsinum.“

Á þeim tíma horfði Martin þó einnig fram á veginn.

„Lífið heldur áfram, það er enn hægt að hlæja, njóta samvista við börnin, slúðra um kæra vini og stela senunni frá mótleikurum sínum,“ skrifaði hann.

„Hvað stóru spurningarnar varðar,“ bætti Martin við, „munu svörin eflaust koma í ljós. Einhvern daginn. Á örskotsstundu.“