Michael Richards, sem er hvað þekktastur fyrir hlutverk sitt sem Cosmo Kramer í Seinfeld, sást opinberlega í fyrsta sinn í tvö ár þegar hann fór í verslunarferð um Melrose Place í West Hollywood þann 10. maí síðastliðinn.

Leikarinn, sem er 76 ára gamall, klæddist dökkum jakka, gallabuxum og þykkbotna skóm. Hann var einnig með einkennandi þykkt hár sitt greitt aftur og gleraugu með glærum umgjörðum.

Richards hefur sjaldan sést opinberlega undanfarin ár eftir að hann hvarf nánast úr sviðsljósinu í kjölfar rasískrar reiðiræðu sem hann hélt á uppistandsklúbbi árið 2006.

„Ég slaufaði sjálfum mér,“ sagði hann í viðtali í Today árið 2024. „Ég þurfti að fjarlægjast skemmtanabransann til að átta mig á því hvað var í gangi innra með mér sem varð til þess að ég hegðaði mér svona hræðilega þetta kvöld, missti stjórn á mér og særði fólk.“

Richards sagði að það sem hann hefði fundið hjá sjálfum sér væri reiði.

„Þegar ég skoðaði þetta mjög vel sá ég að þetta er eitthvað sem fylgir okkur alltaf, allavega mér,“ sagði hann og bætti við að hann hefði síðan beðist afsökunar og reynt að bæta fyrir hegðun sína.

Árið 2018 fékk Richards annað áfall þegar hann greindist með blöðruhálskrabbamein.

„Ég hugsaði: Jæja, þetta er minn tími. Ég er tilbúinn að fara,“ sagði hann í viðtali við People árið 2024.

„En svo hugsaði ég um son minn örfáum sekúndum síðar og heyrði sjálfan mig segja: Ég á níu ára son og mig langar að vera áfram fyrir hann. Er einhver leið fyrir mig að fá aðeins meira líf?““

Richards, sem á fullorðna dóttur að nafni Sophia með fyrrverandi eiginkonu sinni Cathleen Lyons og soninn Antonio með eiginkonu sinni Beth Skipp, ákvað að lokum að gangast undir meðferð.

„Ég þurfti að fara í stóra aðgerð,“ sagði hann. „Ef ég hefði ekki gert það væri ég líklega látinn innan átta mánaða.“

Þrátt fyrir að halda sig áfram til hlés frá skemmtanaiðnaðinum gaf Richards út ævisöguna Entrances and Exits árið 2024.

„Núna þegar ég er kominn á áttræðisaldur og hef farið í gegnum krabbamein langaði mig að fara yfir líf mitt og skilja eftir skriflega frásögn fyrir aðdáendur mína og fjölskyldu,“ sagði hann í samtali við Jay Leno fyrir Interview.

„Ég fer ekki mikið út. Ég er mjög prívat maður. Bókin hefur verið mín leið til að koma fram og segja halló.“