Sammy Lett, 27 ára íbúi í Minneapolis í Bandaríkjunum, hefur vakið töluverða athygli fyrir óvenjuleg uppátæki sem ætlað er að fá fólk til að sleppa fram af sér beislinu og eiga samskipti við ókunnuga.

Í sumar hengdi Lett upp auglýsingar víða um Minneapolis þar sem hann bauð fólki tíu dollara, jafnvirði um 1.200 króna, fyrir að mæta á ákveðnum tíma í Father Hennepin Bluff Park. Verkefnið var einfalt. Fólk átti að finna óþekktan mann sitjandi á bekk með óreimaðan skó og reima skóinn fyrir hann.

Óþekkti maðurinn var Lett sjálfur.

Tilraunin fór þó ekki alveg samkvæmt áætlun í upphafi. Þegar Lett mætti í garðinn hafði annar maður sest á nálægan bekk, einnig með óreimaðan skó. Auk þess stóð tíu dollara seðill upp úr bók sem hann hélt á. Nokkrir þátttakendur töldu því að þar væri rétti maðurinn kominn og byrjuðu að reima skó hans, honum til mikillar undrunar.

Lett náði loks stjórn á aðstæðum og borgaði átta einstaklingum sem þorðu að ganga upp að honum og reima skóinn. Að hans sögn var markmiðið ekki að gera fólk að athlægi heldur skapa skemmtilega og óvænta upplifun.

Þetta er langt frá því að vera eina sérkennilega uppátæki Letts. Hann hefur meðal annars skipulagt lautarferð þar sem þátttakendur klæddust sem krákur og hátíð tileinkaða risastóru geitungahreiðri.

Lett segir við Star Tribune mikla þörf vera fyrir einfaldar og kjánalegar upplifanir þar sem fólk leggur símana frá sér, hittir annað fólk og leyfir sér að vera svolítið skrýtið.