Ragnheiður Ríkharðsdóttir, fyrrverandi þingmaður Sjálfstæðisflokksins og bæjarstjóri Mosfellsbæjar, gagnrýndi í Silfri Egils í gær þann tón sem einkennt hefur pólitíska umræðu að undanförnu og segir miður að stjórnmál snúist í auknum mæli um að ráðast að pólitískum andstæðingum í stað þess að ræða málefni af yfirvegun og ábyrgð.

Bæjarstjórinn fyrrverandi segir mikilvægt að fólk geti rætt stjórnmál út frá eigin gildum og markmiðum með málefnalegum hætti. Að hennar mati sé of algengt að farið sé „í manninn en ekki boltann“ í opinberri umræðu.

Ragnheiður kallar eftir aukinni umræðu um raunveruleg verkefni stjórnmálanna og vill að kjósendur fái skýr svör um hvað frambjóðendur hyggist gera nái þeir kjöri og hvaða mál þeir ætli að leggja áherslu á.

Hún bendir jafnframt á að íbúar hafi mestar áhyggjur af grunnþjónustu sveitarfélaga, þar á meðal grunnskólum, leikskólum og annarri þjónustu sem snerti daglegt líf fólks. „Það þarf að ræða það sem skiptir máli og skiptir íbúa sveitarfélaganna máli. Þetta með kreditkort borgarstjóra skiptir Reykvíkinga ekki rassgat máli.“

Þá leggur hún áherslu á ábyrgð í orðræðu stjórnmálamanna og segir mikilvægt að rætt sé um bæði einstaklinga og málefni af virðingu. Hún telur nauðsynlegt að nýir fulltrúar í Reykjavíkurborg nálgist verkefni sín af málefnalegum hætti og leggi fram skýra sýn á hvernig þeir hyggist bæta borgina.

Að sögn Ragnheiðar er það einna óþægilegast í pólitík þegar stjórnmálamenn stilla sér upp sem þeim einum sem búi yfir réttum lausnum á meðan aðrir séu gerðir lítils virði.