Innlent

Krefjast opinberrar afsökunarbeiðni frá Morgunblaðinu

Félagið Ísland-Palestína gagnrýnir birtingu myndar af Saraa Almasri með frétt um fjárhagsaðstoð Reykjavíkurborgar og segir hana ótengda efninu.

Björgvin Gunnarsson

9. nóvember 2026 · 16:27

Félagið Ísland-Palestína krefst þess að Morgunblaðið biðjist opinberlega afsökunar á birtingu myndar af Saraa Almasri í frétt um fólk sem þiggur fjárhagsaðstoð frá Reykjavíkurborg. Félagið segir myndina hafa verið tekna á mótmælum gegn þjóðarmorði á Gaza og að hún tengist fréttaefninu á engan hátt.

Félagið gagnrýnir myndbirtinguna harðlega í yfirlýsingu. Þar segir að hún virðist ætlað að varpa neikvæðu ljósi á Palestínumenn og konur í umfjöllun um fólk sem þiggur fjárhagsaðstoð frá borginni.

Félagið gagnrýnir einnig það sem það segir vera tilraun sumra fjölmiðla til að vekja neikvæð hugrenningatengsl hjá lesendum. Þeir láti að því liggja að Palestínumenn séu baggi á samfélaginu og valdi ófriði, meðal annars með því að taka þátt í mótmælum.

Félagið bendir jafnframt á að myndin af Saraa Almasri hafi verið fjarlægð úr frétt Morgunblaðsins á netinu eftir mótmæli. Hún sé þó enn í prentaðri útgáfu blaðsins, sem dreift er ókeypis um landið á fimmtudögum.

Af þeim sökum krefst Ísland-Palestína þess að Morgunblaðið biðjist Almasri opinberlega afsökunar.

Í lok yfirlýsingarinnar segir félagið að það muni áfram sýna palestínsku þjóðinni samstöðu, óháð því hvort fólk sé íslenskt, palestínskt eða af öðrum þjóðernum.

Hér má sjá yfirlýsinguna í heild sinni:

Mótmæli vegna myndbirtingar Morgunblaðsins

Félagið Ísland-Palestína mótmælir því að mynd, sem tekin er af mótmælum þess gegn þjóðarmorði, sé notuð við frétt Morgunblaðsins um alls óskylt málefni. Félagið mótmælir jafnframt að myndbirtingin virðist hafa þann tilgang að varpa neikvæðu ljósi á tiltekinn hóp fólks, nánar tiltekið Palestínumenn og konur, í tengslum við umfjöllum um fólk á fjárhagsaðstoð hjá Reykjavíkurborg. Félagið gerir einnig athugasemd við þá almennu tilraun sumra fjölmiðla að reyna að skapa neikvæð hugrenningatengsl hjá lesendum þar sem látið er í það skína að Palestínufólk sé baggi á samfélaginu og til ófriðar m.a. með lýðræðislegri þátttöku sinni í mótmælum sem eru mannréttindi allra.

Kjósa

Hvernig finnst þér þessi grein? Skráðu þig inn til að kjósa.

Veistu meira? Láttu okkur vita

Deila

Efnisorð

Athugasemdir

Skráðu þig inn til að skrifa athugasemd eða kjósa.

Allar athugasemdir eru ábyrgð á þeirra sem þær skrifa. Mannlíf áskilur sér rétt til að fjarlægja ærumeiðandi og óviðeigandi athugasemdir. Hægt er að láta vita af athugasemdum með því að smella á Tilkynna.