Ný langtímaspá evrópsku reiknimiðstöðvarinnar bendir til þess að úrkoma verði undir meðallagi á Íslandi í vetur, einkum suðvestur af landinu. Veðurfræðingurinn Einar Sveinbjörnsson segir spána afgerandi og telur tengsl við El Niño geta skýrt veðurmynstrið.
Einar Sveinbjörnsson veðurfræðingur fjallar um nýjustu langtímaspá Evrópsku reiknimiðstöðvarinnar í færslu á Facebook. Spáin tekur til vetrarmánaðanna þriggja, desember, janúar og febrúar, og er að hans sögn mjög áþekk októberspánni.
Einar segir spána svo afgerandi og stöðuga að ekki sé hægt að horfa fram hjá henni og jafnvel ástæða til að taka fullt mark á henni. Hann bendir þó á að þótt spáin gefi skýra mynd af vetrinum í heild geti veðrið sveiflast mikið á tímabilinu.
Samkvæmt spánni er gert ráð fyrir lágu hæðarfráviki yfir stóru svæði suður af Alaska, sem teygir sig austur yfir Bandaríkin og út á Atlantshaf. Á móti kemur öflugt hæðarfrávik yfir Grænlandi og norðausturhluta Kanada.
Þetta þýðir að lægðabrautin gæti legið mun sunnar á Atlantshafi en að jafnaði, en jafnframt er gert ráð fyrir einkennandi Grænlandshæð.
Líkur á úrkomu undir meðallagi
Spár um úrkomu sýna auknar líkur á að heildarúrkoma yfir vetrarmánuðina verði í neðsta þriðjungi þess sem mælst hefur yfir langt tímabil. Þurrðarsvæði sést nærri Íslandi og sérstaklega suðvestur af landinu.
Á meginlandi Evrópu eru hins vegar ekki taldar miklar líkur á úrkomu undir meðallagi. Þar gæti fremur orðið úrkomusamt, sem samræmist spánni um legu lægðabrautarinnar.
Einar veltir jafnframt fyrir sér tengslum veðurmynstursins við El Niño, en styðst þar meðal annars við skýringar bandaríska veðurfræðingsins Bon Nolls.
Samkvæmt þeirri skýringu eykur El Niño þrumuveður nærri miðbaug. Við þau losnar varmi hátt upp í lofthjúpinn, sem styrkir Hadley-hringrásina og eykur hitamun milli hitabeltisins og norðlægari breiddargráða. Það leiðir síðan til þess að hvarfbaugsröstin, eða þotustraumurinn, styrkist.
Nýjar spár sýni samkvæmt Noll sérstaklega öflugan þotustraum yfir Kyrrahafi og Bandaríkjunum í vetur, með metöflugum háloftavindum frá Kaliforníu til Flórída. Áhrifin geti einnig náð til Evrópu.
Einar bendir á að kaldi hvirfillinn suður af Alaska sé einnig hluti af þessu veðurmynstri og ýti undir háa hæðarfrávikið yfir Kanada og Grænlandi. Þannig geti tengingin við El Niño haft áhrif á veðurfar hér við Norður-Atlantshaf.
Að lokum nefnir Einar að ýmislegt bendi til þess að Norður-Atlantshafssveiflan, NAO-vísirinn, verði mjög neikvæður samkvæmt spánni. Hann telur áhugavert að bera slíka spá saman við fyrri vetur þar sem sambærilega afgerandi neikvæð NAO-staða hefur verið til staðar.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir