Alls voru 65 mál bókuð hjá lögreglunni á höfuðborgarsvæðinu á tímabilinu frá klukkan 17 í gær til klukkan 5 í morgun. Meðal verkefna lögreglu voru líkamsárás í miðbæ Reykjavíkur, ölvunarakstur og umferðarslys þar sem bifreið ók á ljósastaur.
Þrír einstaklingar gista fangageymslur lögreglunnar á höfuðborgarsvæðinu eftir nóttina. Alls voru 65 mál skráð í kerfi lögreglu á tólf klukkustunda tímabili, frá klukkan 17 í gær til klukkan 5 í morgun.
Lögregla handtók tvo vegna líkamsárásar í miðborg Reykjavíkur. Sá sem varð fyrir árásinni rotaðist og var fluttur á slysadeild. Mennirnir voru fluttir á lögreglustöðina við Hverfisgötu. Annar var vistaður í fangageymslu en hinum sleppt að lokinni vettvangsskýrslu.
Þá var maður handtekinn eftir útistöður við dyraverði í miðbænum. Honum var fyrst sleppt eftir viðræður við lögreglu og fékk hann fyrirmæli um að snúa ekki aftur í miðbæ Reykjavíkur það sem eftir lifði kvölds. Hann kom þó aftur í miðbæinn skömmu síðar, var handtekinn á ný og vistaður í fangaklefa vegna ástands síns.
Fimm ökumenn grunaðir um ölvunar- eða fíkniefnaakstur
Alls voru sjö ökumenn stöðvaðir í akstri víðs vegar á höfuðborgarsvæðinu, grunaðir um akstur undir áhrifum áfengis eða fíkniefna.
Sex þeirra voru látnir lausir að lokinni sýnatöku lögreglu. Sá sjöundi var handtekinn af lögreglunni sem annast útköll í Grafarvogi, Mosfellsbæ eða Árbæ, eftir að hafa ekið upp á hringtorg og þaðan á ljósastaur. Maðurinn er grunaður um ölvunarakstur og var vistaður í fangaklefa vegna rannsóknar málsins.
Lögreglan sem starfar í Hafnarfirði, Garðabæ og á Álftanesi var einnig kölluð til vegna ungmenna sem voru til vandræða. Málið reyndist minniháttar og ekki reyndist þörf á afskiptum lögreglu.
Athugasemdir