Gauti B. Eggertsson, hagfræðiprófessor við Brown-háskóla í Bandaríkjunum, gagnrýnir harðlega þá umræðu að múslimar geti ekki lifað í sátt og samlyndi við kristið fólk. Hann segir slíkar fullyrðingar bera vott um „djúpstæða vanþekkingu á menningu okkar og sögu mannkynsins“.
Gauti B. Eggertsson hagfræðiprófessor skrifar um sambúð múslima og kristinna í færslu á Facebook þar sem hann bendir á að múslimar hafi nýverið náð kjöri í mikilvæg embætti í Bandaríkjunum.
Hann nefnir meðal annars að í New York-borg séu um fjögur prósent kjósenda múslimar en meirihluti kjósenda hafi kosið múslima sem borgarstjóra. Í Michigan séu um tvö prósent íbúa múslimar og þar hafi Abdul El-Sayed nýverið verið kjörinn fulltrúi í öldungadeild Bandaríkjaþings.
„Almennt er bara fín stemmning í Michigan og New York,“ skrifar Gauti.
Hann bendir jafnframt á að um 26 prósent mannkyns séu múslimar og 29 prósent kristnir. Bæði trúarbrögðin séu abrahamísk og eigi sameiginlegar rætur í trúarhefð sem einnig nái til gyðingdóms.
„Þessi tvö trúarbrögð ná því til meira en helmings mannkyns. Að halda því fram að fólk sem aðhyllist íslam geti ekki lifað í sátt og samlyndi við fólk sem aðhyllist kristni lýsir djúpstæðri vanþekkingu á menningu okkar og sögu mannkynsins,“ skrifar hann.
Segir öfgafólk öskra hærra en aðrir
Gauti segir að fólk með vafasamar hvatir og siðferðislega annmarka sé að finna innan allra trúarhópa.
„Enginn trúarhópur hefur einkarétt á slíku fólki,“ segir hann.
Hann telur að siðlaus og öfgafull umræða, gegnsýrð af mannfyrirlitningu, hafi færst í aukana meðal öfgafólks innan beggja trúarhópa á undanförnum árum.
Hann segir þó að um sé að ræða mjög þröngan hóp sem hafi ekki sama fylgi meðal almennings og hávær umræða hans gefi til kynna.
„En þessi fámenni, fúllyndi hópur öskrar hærra en venjulegt fullorðið fólk,“ skrifar Gauti.
Við færsluna birtir Gauti mynd af Stefáni Einari Stefánssyni, siðfræðingi og fjölmiðlamanni á Morgunblaðinu. Hann tekur þó sérstaklega fram í færslunni að myndbirtingin tengist efni hennar ekki.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir