Ísraelska sjónvarpsstöðin Channel 13 hefur vikið fyrrverandi knattspyrnustjörnunni og fjölmiðlamanninum Eyal Berkovic tímabundið úr starfi eftir að hann lét rasísk ummæli falla í beinni útsendingu kvöldið áður. Þar dró hann í efa að Arabar og múslimar hefðu til þess hæfni að bera doktorsheitið.
Berkovic lét ummælin falla í samtali við Suleiman Maswadeh, fréttaritara stöðvarinnar í Washington, í þættinum Moria and Berko. Hann stýrir þættinum ásamt Moriu Asraf. Umræðuefnið var Abdul El-Sayed, sem kjörinn hefur verið öldungadeildarþingmaður í Bandaríkjunum og er fyrsti músliminn til að ná kjöri í öldungadeildina.
„Kynnið ykkur doktor Abdul El-Sayed,“ sagði Maswadeh við þáttastjórnendurna. Berkovic greip fram í fyrir honum og sagði: „Nú eru allir orðnir doktorar.“
Maswadeh svaraði því til að El-Sayed væri „sannarlega doktor“, en Berkovic svaraði: „Það er líka sagt að Ahmad Tibi sé doktor,“ og vísaði þar til ísraelsks þingmanns. „Láttu hann þá sýna prófskírteinið sitt. Allir eru doktorar,“ sagði Berkovic á meðan Asraf hló.
Maswadeh virtist undrandi og svaraði: „En Tibi er líka doktor. Þú tókst umræðuna í allt aðra átt.“
Ahmad Tibi, sem fer fyrir stjórnmálaflokknum Ta'al, starfaði sem kvensjúkdómalæknir áður en hann hóf þátttöku í stjórnmálum og tók sæti á þingi.
„Moria er líka doktor,“ bætti Berkovic við á meðan Asraf hélt áfram að hlæja.
Channel 13 sagði í yfirlýsingu að „tjáningarfrelsi og fjölbreytni skoðana séu hornsteinar frjálsrar fjölmiðlunar, en þau réttlæti ekki rasísk ummæli“. Þá sagði stöðin að „ummælin sem féllu í gær í þættinum Moria and Berko séu óásættanleg og samræmist ekki gildum fyrirtækisins“.
Stöðin sagði enn fremur að í kjölfar atviksins hefði verið haldinn fundur með Eyal Berkovic þar sem málið var rætt. Að honum loknum hefði verið ákveðið að taka hann úr útsendingum þegar í stað.
Heimildarmaður sem þekkir vel til innri málefna stöðvarinnar sagði við ísraelska miðilinn Haaretz að blaðamenn hjá Channel 13 væru að velta því fyrir sér hvers vegna aðeins Berkovic hefði verið vikið úr starfi en ekki Moria Asraf, sem hefði ýtt undir ummælin, hlegið í myndverinu og einnig átt þátt í atvikinu.
Berkovic hefur nú í annað sinn á innan við tveimur vikum vakið deilur með ummælum sínum. Á kjördag lét hann kynþáttafordóma í ljós í garð Lucy Aharish, arabísk-ísraelsks fréttamanns og fréttaþular, og sagði henni að „fara og hrópa svona í þorpinu sínu“. Aharish, sem starfar hjá Channel 13, neitaði í kjölfarið að stjórna þætti sínum, Talk of the Day, í þrjá daga.
Háttsettur stjórnandi hjá Channel 13 sagði við Haaretz í síðustu viku að spjallþáttur Asraf og Berkovic hefði þróast í „vettvang fyrir hatursáróður“.
Í kjölfar ummælanna var viðtali sem Omri Assenheim, starfsmaður stöðvarinnar, hafði tekið við Berkovic skyndilega kippt úr dagskrá rétt áður en það átti að fara í loftið.
Channel 13 sagði í dag að enn hefði ekki verið tekin „endanleg ákvörðun um hvort viðtalið yrði sýnt eða það fellt úr dagskrá, en eins og staðan er núna er ekki gert ráð fyrir að það verði sýnt“.
Sérðu villu? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir