Gefur andvirði 300 ára gamals ættaróðals til barna á Gaza

Öldruð kona á Suður-Ítalíu hefur ákveðið að selja ætt­ar­heim­ili sitt frá 17. öld og gefa allan sölu­á­góð­ann til Lækna án landamæra. Mark­miðið er að fjár­magna heil­brigð­is­þjón­ustu fyrir börn á Gaza.

Konan, Eugenia Granito, býr í þorp­inu Rocca Cilento í Salerno-hér­aði. Hún von­ast til þess að féð geti meðal ann­ars nýst til að byggja sjúkra­hús eða aðra heil­brigð­is­stofnun fyrir börn sem hafa orðið fyrir áhrifum af stríð­inu og eiga erfitt með að fá nauð­syn­lega lækn­is­að­stoð.

„Allt sem ég fæ fyrir sölu húss­ins mun renna til Lækna án landamæra vegna barn­anna á Gaza,“ sagði hún í við­tali við Vanity Fair Italia sem birt­ist 5. nóv­em­ber.

Granito hyggst ráð­færa sig við sam­tökin um hvernig best sé að nýta fram­lagið. Hún von­ast til þess að hægt verði að koma á fót heil­brigð­is­stofnun fyrir börnin.

„Þegar við förum til lög­bókand­ans verða þau að segja mér hvað þau vilja gera við þessa pen­inga: byggja sjúkra­hús eða aðra stofnun svo að þessi börn þurfi ekki lengur að deyja,“ sagði hún.

Húsið geymir minningar margra kynslóða

Ákvörð­unin felur í sér að Granito lætur af hendi eign sem hefur verið nátengd fjöl­skyldu hennar í margar kyn­slóðir.

Húsið er frá 17. öld og í því er meðal ann­ars kapella helguð heilögum Jósef. Tilvist kapell­unnar var skráð árið 1751 þegar biskup heim­sótti svæðið, en Granito-fjöl­skyldan lét reisa hana.

Í garð­inum eru einnig tré sem tengj­ast per­sónu­legum minn­ingum hennar. Þar stendur meðal ann­ars kakí­tré sem faðir hennar gróð­ur­setti árið 1949 í til­efni af brúð­kaupi hennar. Tréð hefur því staðið í garð­inum í nær átta ára­tugi, ásamt val­hnetu­tré og kirsu­berja­tré.

Fast­eigna­sal­inn Francesco Pio Figliola sér um söl­una. Hann sér­hæfir sig í verð­mætum fast­eignum á Cilento-svæð­inu og vakti fyrst athygli á ákvörðun Granito á sam­fé­lags­miðlum.

Figliola seg­ist aldrei hafa kynnst sam­bæri­legri gjörð á ferli sínum. Það snerti hann djúpt að hún skuli nota eign sem geymir minn­ingar fjöl­skyld­unnar til að hjálpa börnum sem þjást gríð­ar­lega vegna þjóð­ar­morðs­ins.

Fleiri hafa gefið söluágóða til heilbrigðismála

Á Ítalíu eru fleiri dæmi um að ein­stak­lingar hafi ráð­stafað sölu­and­virði fast­eigna og arfi til heil­brigð­is­þjón­ustu og góð­gerð­ar­mála.

Árið 2024 var ein­býl­is­hús í Pescara, sem til­heyrði barn­lausu hjón­unum Sergio Anni­baldi og Alda Lanciotti, selt fyrir 286.968,49 evrur. Hjónin höfðu áður ákveðið að húsið yrði selt og and­virðið nýtt til góð­gerð­ar­mála.

Féð var notað til að kaupa lækn­inga­tæki fyrir nýbura-, barna- og barna­skurð­deildir Santo Spirito-sjúkra­húss­ins.

Víða um Ítalíu hafa ein­stak­lingar einnig ánafnað heil­brigð­is­stofn­unum fast­eignir og sparifé. Slíkar arf­gjafir hafa meðal ann­ars nýst til að styðja með­ferð barna með krabba­mein og líkn­ar­með­ferð, auk þess að kaupa tæki fyrir sjúkra­hús.