Íslenska hljómsveitin Fjöll gaf í dag út lagið Waltzing the Tides, sem er fyrsta smáskífan af væntanlegri breiðskífu sveitarinnar. Platan er væntanleg síðar á árinu en upptökuferli hennar hófst í Valencia fyrir rúmu ári síðan. Hljómsveitin hefur unnið jafnt og þétt að upptökum frá þeim tíma.

Waltzing the Tides er rólegt indírokk með djúpum og melankólískum undirtóni þar sem tekist er á við þunga fortíðarinnar og áhrif hennar á nútímann. Lagið markar nýjan kafla í útgáfuferli sveitarinnar og gefur tóninn fyrir komandi plötu.

Meðlimir Fjalla eru Guðmundur Árnason, söngvari, hljómborðs- og munnhörpuleikari, Snorri Gunnarsson gítarleikari og söngvari, Guðmundur Freyr Jónasson gítarleikari, Kristinn Jón Arnarson bassaleikari og Ragnar Þór Ingólfsson trommari og ráðherra.

Hljómsveitin hefur starfað um nokkurra ára skeið en nokkrir meðlimir hennar eiga sér langa sameiginlega tónlistarsögu.