Hvað verður eiginlega um gömlu gallabuxurnar, bolinn sem enginn nennir lengur að ganga í og allt hitt dótið sem við losum okkur við? Endar þetta í nýju lífi, brennsluofni eða á risastórum haug hinum megin á hnettinum?

Freyr Eyjólfsson ætlar að kafa ofan í þessar spurningar á Borgarbókasafninu Árbæ mánudaginn 14. september klukkan 16:30.

Freyr er sjálfskipaður og forfallinn „hringrásarhagkerfispeppari“ og telur að við getum bæði bætt heiminn og eigið líf með því að hugsa aðeins öðruvísi um hlutina sem við eigum – og sérstaklega það sem við erum hætt að nota.

Hann segir hringrásarhagkerfið ekki aðeins snúast um flokkun og endurvinnslu heldur einnig loftslagsmál, þjóðaröryggi, hagkvæmni, sjálfbærni og lýðheilsu.

Freyr ætti að þekkja málaflokkinn ágætlega. Hann er verkefnastjóri hjá Sorpu en hefur auk þess komið víða við sem tónlistarmaður og fjölmiðlamaður.

Spjallið er hluti af alþjóðlega verkefninu make-a-thek sem Borgarbókasafnið tekur þátt í næstu þrjú árin. Markmiðið er að koma saman fólki sem vill finna nýjar og skapandi leiðir til að draga úr sóun.

Þannig að áður en næsti bolur fær flugmiða í ruslið gæti verið ráð að heyra hvað hringrásarhagkerfispepparinn hefur um málið að segja.