Hljómsveitin Úlfur Úlfur hélt tónleika í Fantasíusal Kjarvals í gær þar sem sveitin flutti lög af ferli sínum fyrir dyggan hóp aðdáenda. Mikið stuð var á tónleikunum og greinilegt að margir gestanna þekktu tónlist sveitarinnar vel.

Á efnisskránni voru lög af öllum plötum sveitarinnar.

Úlf Úlf skipa þeir Arnar Freyr Frostason og Helgi Sæmundur Guðmundsson. Sveitin hefur verið áberandi í íslensku tónlistarlífi frá því að platan Föstudagurinn langi kom út árið 2011, en báðir höfðu þeir þó gert tónlist um árabil áður.

Helgi vann rappkeppnina Rímnaflæði undir listamannsnafninu Helgi Evilmind snemma á þessari öld og Arnar Freyr hafnaði síðar í öðru sæti í sömu keppni undir nafninu Talandi Tunga. Þá unnu þeir Músíktilraunir árið 2009 sem meðlimir hljómsveitarinnar Bróðir Svartúlfs.

Úlfur Úlfur hefur frá upphafi gefið út fjórar breiðskífur og eina stuttskífu.

Með þeim Arnari Frey og Helga á sviðinu í gær voru trommarinn Hrafnkell Örn Guðjónsson, sem er meðal annars þekktur fyrir leik sinn með Agent Fresco, og gítarleikarinn Reynir Snær Magnússon.

Stemningin var mikil í Fantasíusalnum og tóku tónleikagestir vel undir með sveitinni. Ljóst var að fjölmargir dyggir aðdáendur Úlfs Úlfs voru á meðal gesta.