Ósló, höfuðborg Noregs, tilkynnti í dag að snjallgleraugu hefðu verið bönnuð í skólum borgarinnar. Bannið nær yfir allan skóladaginn og öll skólastig, að því er fram kemur í yfirlýsingu borgaryfirvalda.

Julie Remen Midtgarden, aðstoðarborgarstjóri menntamála í Ósló, sagði að markmiðið væri að koma í veg fyrir að börn yrðu, eins og hún orðaði það, „statistar í gagnasöfnun Meta". Hún sagði stjórnmálamenn verða að þora að vera hreinskilnir um hvað málið snerist raunverulega um: eitt af auðugustu fyrirtækjum heims hefði sett á markað vöru sem gerði það að verkum að ómögulegt væri að vita hvenær verið væri að taka mann upp á myndband.

Midtgarden gagnrýndi jafnframt vinstristjórn Noregs, sem hefur sagst hafa sett á fót sérfræðingahóp til að skoða reglusetningu um slík tæki og notkun andlitsgreiningar á almannafæri. Hún sagði gleraugun þegar til sölu í Noregi, þau væru þegar notuð á norskum skólalóðum, og að vandinn væri til staðar núna og að skoða málið væri ekki það sama og að grípa til aðgerða.

Snjallgleraugu gera notendum kleift að taka myndir og myndbönd, hlusta á tónlist, taka við símtölum, þýða skilti á erlendum tungumálum, varpa texta eða kortum inn í sjónsvið notandans, auk þess að eiga samskipti við innbyggðan gervigreindaraðstoðarmann. Fram hefur komið að Meta hafi þróað andlitsgreiningarbúnað sem tilbúinn er til að samþætta við snjallgleraugu fyrirtækisins.