Vaxtarræktarkappinn og líkamsræktarþjálfarinn Einar Méndez er látinn, 48 ára að aldri. Hann lést 4. september eftir að hafa hnigið niður að lokinni æfingu í líkamsræktarstöð sinni í Mexíkóborg.

Eiginkona hans, Yan Méndez, greindi frá andlátinu á samfélagsmiðlum og sagði að Einar hefði látist af völdum skyndilegs hjartaáfalls.

„Hvíldu í friði, ástin í lífi mínu. Fljúgðu eins hátt og þú getur og ég lofa að við munum hittast aftur,“ skrifaði Yan í færslu á Instagram.

Hjónin höfðu nýlega fagnað 30 ára sambandsafmæli sínu og stóð til að þau færu fljótlega í sína fyrstu ferð saman til New York. Þau eignuðust þrjár dætur, Fanny, Fridu og Maríu Reginu.

Einar var þekktur innan líkamsræktarheimsins og hafði jafnframt byggt upp töluverðan fylgjendahóp á samfélagsmiðlum.

Auk eigin ferils í vaxtarrækt starfaði hann sem þjálfari og hafði meðal annars þjálfað þekkta einstaklinga í Mexíkó. Þar á meðal var sjónvarpskonan Martha Debayle, sem hafði unnið með honum í níu ár.

Martha minntist Einars eftir andlátið og sagði fólk enn vera í áfalli vegna skyndilegs fráfalls hans. Hann hefði látist í líkamsræktarstöðinni.

Hún sagði jafnframt að ekki myndi líða sá dagur sem hún æfði án þess að hugsa til Einars.