Gítarleikarinn Guðmundur Pétursson snýr aftur á gamlar slóðir um helgina þegar hann heldur tónleika á Borgarbókasafninu Gerðubergi í Breiðholti.

Guðmundur þekkir hverfið vel enda bjó hann í Breiðholtinu á unglingsárunum og ber enn sterkar taugar þangað. Tónleikarnir fara fram laugardaginn 12. september, frá klukkan 15 til 16.

Það verður fámennt en góðmennt á sviðinu því Guðmundur mætir einn með gítarinn og ætlar að bjóða gestum í ferðalag um sinn tónlistarheim. Á dagskránni verða eigin tónsmíðar, blús og valin lög af plötum hans.

Þar á meðal verða verk af plötunni Wandering Beings, sem færði Guðmundi Íslensku tónlistarverðlaunin árið 2024.

Guðmund þarf vart að kynna fyrir íslenskum tónlistarunnendum. Hann hefur um árabil verið í hópi fremstu gítarleikara landsins og spilað með fjölmörgu íslensku og erlendu tónlistarfólki. Þá hefur hann komið víða við í tónlistinni og tekið þátt í ótal verkefnum, bæði hér heima og erlendis.

Nú er hins vegar komið að því að snúa aftur í Breiðholtið – bara Guðmundur, gítarinn og gestir Gerðubergs.

Aðgangur að tónleikunum er ókeypis og öll eru velkomin á meðan húsrúm leyfir.