Bandarísk kona, sem ákærð er fyrir að hafa orðið tveggja ára syni sínum að bana, er einnig sögð hafa ætlað að eitra fyrir eiginmanni sínum þegar hann kæmi heim úr vinnu. Saksóknarar greindu frá þessu þegar konan kom fyrir dómara á miðvikudag.

Corie Walsh er ákærð fyrir morðið á syni sínum, Barrett „Bear“ Walsh.

Samkvæmt saksóknurum komu tvö önnur börn sem búa á heimilinu að drengnum í kjallara hússins. Þau yfirgáfu húsið þegar í stað og leituðu aðstoðar nágranna. Barrett var fluttur á sjúkrahús en úrskurðaður látinn skömmu síðar.

Saksóknarar segja Walsh hafa fundist síðar sitjandi í baðkari þar sem blóð var í vatninu. Hún var með skurði á úlnliðum og lærum. Að sögn ákæruvaldsins sagði hún lögreglu að hún hefði orðið syni sínum að bana vegna þess að hún teldi hann vera „djöfulinn“ og „andkrist“.

Þá er Walsh sögð hafa lýst því yfir að hún hygðist eitra fyrir eiginmanni sínum þegar hann kæmi heim úr vinnu síðar um kvöldið.

Andrea Lyon, verjandi Walsh, segir hana hafa verið í alvarlegri geðrænni krísu þegar sonur hennar lést.

Walsh er jafnframt sögð hafa fylgst náið með réttarhöldunum yfir Lindsay Clancy og rætt málið í skilaboðum við vini sína. Á samfélagsmiðlum hafa komið fram ásakanir um að Walsh hafi sótt innblástur í mál Clancy fyrir eigin málsvörn. Lyon hefur alfarið hafnað þeim fullyrðingum og lýst þeim sem „viðbjóðslegum“.