Dóttir Kim Jong Un, leiðtoga Norður-Kóreu, er talin eiga yngra systkini og er sjálf talin líklegust til að taka við völdum af föður sínum. Þetta kemur fram í nýju mati suðurkóresku leyniþjónustunnar, NIS.

Leyniþjónustan hefur áður talið að Kim eigi þrjú börn en nokkur óvissa hefur ríkt um aldur þeirra og röð. Dóttir hans, Kim Ju Ae, kom fyrst fram opinberlega árið 2022 þegar hún fylgdi föður sínum við eldflaugaskot á langdrægri eldflaug.

NIS segir nú að Kim Ju Ae sé að öllum líkindum undirbúin fyrir það að verða arftaki föður síns. Stofnunin telji jafnframt að hún eigi yngra systkini, en kyn þess sé ekki vitað.

Áfram sé unnið að því að staðfesta hvort Kim Ju Ae eigi einnig eldri bróður. Suðurkóreska leyniþjónustan telur þó að jafnvel þótt slíkur bróðir sé til staðar sé hann ekki í þeirri stöðu að geta tekið við völdum.

Kim Ju Ae hefur frá árinu 2022 ítrekað birst við hlið föður síns á mikilvægum pólitískum og hernaðarlegum viðburðum. Hún fylgdi honum meðal annars í áberandi heimsókn til Peking.

Ríkisfjölmiðlar Norður-Kóreu hafa kallað hana „elskaða barnið“ og einnig notað um hana hugtakið „hyangdo“, sem vísar til leiðtogahlutverks og hefur jafnan verið tengt æðstu leiðtogum landsins og mögulegum arftökum þeirra.

Kim-fjölskyldan hefur farið með völd í Norður-Kóreu í áratugi og hefur svonefnd Paektu-blóðlína fjölskyldunnar gegnt lykilhlutverki í áróðri stjórnvalda.