Knattspyrnusamband Svíþjóðar hefur verið gert að greiða sekt sem nemur um 90.000 sænskum krónum vegna atviks sem átti sér stað í leik karlalandsliðsins gegn Póllandi þann 31 mars.
Málið vakti þegar athygli í tengslum við leikinn, meðal annars þegar áhrifavaldurinn Maja Nilsson Lindelöf, en hún er eiginkona leikmanns í sænska landsliðinu, birti færslu á Snapchat þar sem hún skrifaði „Ashamed to death“ („skammast mín til dauða“).
Sænska knattspyrnusambandið (SvFF) tilkynnti að það samþykki niðurstöðu aganefndar FIFA og muni ekki áfrýja henni.
„Við sjáum eftir því sem gerðist og erum sammála mati FIFA um að það sé óvirðing að baula á þjóðsöng gestaliðsins. Við viljum ekki sjá slíka hegðun hjá áhorfendum okkar,“ segir framkvæmdastjórinn Niclas Carlnén.
„Á að haga sér rétt“
Leikurinn fór fram á þjóðarleikvanginum Strawberry Arena í Solna þann 31. mars.
Svíþjóð vann leikinn 3–2 og tryggði sér þar með sæti á heimsmeistaramótinu í sumar.
„Við erum afar ánægð með og kunnum að meta þann stuðning og þá tryggð sem stuðningsmenn sýna landsliðunum okkar. En við viljum vera skýr: fólk á að haga sér rétt þegar þjóðsöngvar eru leiknir,“ segir Carlnén.
Svíar hafa áður verið sektaðir um 60.000 krónur fyrir að baula á þjóðsöng Sviss í undankeppni heimsmeistaramótsins í október.
