Talsverður hiti var í mönnum eftir leik Vals og KR í Bestu deild karla í knattspyrnu í gærkvöldi, þar sem KR hafði betur með afgerandi hætti, 4–1, fyrir framan troðfullan völl.

Eftir leikinn kom til orðaskipta og átaka í göngum vallarins. Samkvæmt heimildum Fótbolta.net voru leikmenn KR ósáttir við framkomu Hermanns Hreiðarssonar, þjálfara Vals, og sökuðu hann um að hafa veitt Ástbirni Þórðarsyni, leikmanni KR, högg eftir leikslok.

Heimildir Fótbolta.net herma að KR-ingar hafi talið Hermann hafa slegið Ástbjörn í þindina. Mikil spenna ríkti á svæðinu að sögn miðilsins og deilur áttu sér stað milli aðila í kjölfarið.

Hermann lét einnig óánægju sína með dómgæslu leiksins í ljós eftir leik. Í viðtali gagnrýndi hann Ástbjörn og sagði leikmanninn hafa komist upp með brot gegn leikmönnum Vals ítrekað í leiknum.