Kona sem sakaði bandaríska rapparann Jay-Z um nauðgun hefur dregið ásakanir sínar til baka og segir þær rangar. Hún kveðst aldrei hafa hitt tónlistarmanninn og biðst afsökunar á þeim skaða sem ásakanirnar hafi valdið honum og fjölskyldu hans.
Konan höfðaði mál undir nafnleynd og hélt því fram að Jay-Z, sem heitir réttu nafni Shawn Carter, og Sean „Diddy“ Combs hefðu nauðgað henni þegar hún var 13 ára. Lögmaðurinn Tony Buzbee lagði málið upphaflega fram fyrir hennar hönd í desember 2024.
Í nýjum dómsgögnum, sem TMZ hefur undir höndum, segir konan að ekkert hæft sé í ásökunum hennar á hendur Carter. Hún tekur jafnframt fram að hún hafi ekki fengið neinar greiðslur eða aðrar fjárhagslegar bætur frá honum eða aðilum sem tengjast honum fyrir að draga ásakanirnar til baka.
Nýr lögmaður konunnar, James Blair Newman Jr., segir hana áfram halda því fram að hún hafi orðið fyrir kynferðisofbeldi en að hún hafi haft rangt fyrir sér þegar hún nafngreindi Carter sem geranda. Hann hafi hvorki nauðgað henni né beitt hana kynferðisofbeldi og þau hafi aldrei hist.
Konan segist hafa komist í samband við lögmenn haustið 2024 eftir að hafa séð auglýsingu á Facebook þar sem leitað var að fólki sem kynni að eiga kröfur vegna kynferðisofbeldis gegn Combs. Auglýsingin hafi vakið upp minningar hennar um meint ofbeldi þegar hún var 13 ára.
Jay-Z hefur frá upphafi alfarið hafnað ásökununum. Árið 2025 höfðaði hann mál gegn Buzbee, lögmannsstofu hans og konunni. Hann hefur nú fallið frá málarekstri gegn konunni en heldur áfram málsókn sinni gegn Buzbee.
