Tveggja herbergja íbúð við Kuggavog 17 í Reykjavík hefur verið sett á sölu fyrir 59.990.000 krónur. Íbúðin er 62,2 fermetrar að stærð og er á jarðhæð í fjölbýlishúsi sem reist var árið 2019.
Um er að ræða bjarta og vel skipulagða íbúð þar sem aukin lofthæð setur sterkan svip á rýmið. Lofthæðin nær mest 3,6 metrum en er 3,2 metrar í hluta stofunnar.
Íbúðin er búin vönduðum HTH-innréttingum og eldhústækjum frá AEG, þar á meðal veggofni, spanhelluborði, uppþvottavél og gufugleypi. Steinborðplötur eru bæði í eldhúsi og á baðherbergi.
Baðherbergið er að hluta flísalagt og þar er gólfhiti. Ál-tré gluggar og hurðir eru í íbúðinni auk K-einangrunarglers og myndadyrasíma. Þá eru milliveggir úr þrýstihertri frauðsteypu. Húsið var klætt að utan árið 2025.
Kuggavogur er í Vogabyggð, nýlegu borgarhverfi við Elliðavog þar sem mikil uppbygging hefur átt sér stað undanfarin ár. Ýmis þjónusta er í næsta nágrenni, meðal annars leikskóli, Menntaskólinn við Sund og matvöruverslun.
Hamborgaraunnendur þurfa heldur ekki að leita langt því hinn vinsæli hamborgarastaður 2Guys er í göngufæri frá Kuggavogi. Staðsetningin býður því bæði upp á nálægð við Elliðavoginn og fjölbreytta þjónustu og veitingastaði.
