Bangsafélagið stendur að Reykjavík Bear helginni sem haldin verður dagana 28.–31. ágúst í höfuðborginni. Um er að ræða tímamótahátíð þar sem fagnað verður bæði fimm ára afmæli hátíðarinnar og 20 ára sögu bangsasamfélagsins á Íslandi. Gert er ráð fyrir um 100 gestum hvaðanæva að úr heiminum sem koma saman til að njóta fjölbreyttrar dagskrár og samveru.
Í fyrsta sinn verður haldin keppnin Mr. Reykjavík Bear, þar sem lögð er áhersla á fjölbreytileika, sjálfsöryggi og samstöðu samfélagsins. Dómnefnd skipuð bæði íslenskum og erlendum sérfræðingum mun velja sigurvegara með aðkomu áhorfenda, sem geta tekið þátt í kosningunni á vef Bangsafélagsins. Sigurvegari hlýtur titilinn Mr. Reykjavík Bear og verður fulltrúi bangsasamfélagsins á Íslandi sem og sendiherra þess á viðburðum erlendis á árinu.
Reykjavík Bear helgin stendur yfir í fjóra daga og býður upp á fjölbreytta dagskrá. Þar á meðal eru skoðunarferð um Gullna hringinn, heimsóknir í Sky Lagoon, Bláa lónið og sjóböðin í Hvammsvík auk fjölda kvöldviðburða. Meðal hápunkta verður Top Off Party á föstudagskvöldi en aðalviðburður helgarinnar er Mr. Reykjavík Bear keppnin sem fram fer á Lemmy.
Bangsafélagið, sem stofnað var árið 2019, vinnur að því að efla samstöðu, sýnileika og jákvæða líkamsímynd innan hinsegin samfélagsins. Félagið er hagsmunaaðili Samtakanna ’78 og leggur áherslu á að skapa öruggt rými þar sem allir geti fundið vináttu, samstöðu og gleði, óháð líkamsgerð eða kynvitund.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Athugasemdir