Ákveðið hefur verið að fjölmiðlakonan Gunna Dís Emilsdóttir muni lýsa Eurovision í ár en Rúnar Freyr Gíslason, framkvæmdastjóri Söngvakeppninnar, staðfesti það í samtali við Mannlíf.
Gunna Dís sá einnig um að lýsa keppninni í fyrra eftir að Gísli Marteinn Baldursson dró sig í hlé vegna þátttöku Ísrael. Með henni var íþróttafréttamaðurinn Gunnar Birgisson og standa vonir til að hann verði aftur með henni ár en það hefur þó ekki verið staðfest að sögn Rúnars.
Keppnin í ár verður haldin í Sviss og mun hljómsveitin VÆB koma fram fyrir hönd Íslands þar og flytur sveitin lagið RÓA en bræðurnir sigruðu Söngvakeppnina örugglega nú fyrir stuttu. Veðbankar erlendis eru ekki jafn hrifnir af framlagi VÆB og íslenska þjóðin en sem stendur er þeim spáð 34. sæti en alls taka 37 þjóðir þátt þetta árið.
Mestar líkur eru á því að Svíar vinni samkvæmt veðbönkum en rétt er að taka fram að Svíar hafa ekki ennþá valið framlag sitt í ár og verður það ekki gert fyrr en 8. mars næstkomandi. Frökkum er svo spáð öðru sætinu og Finnum því þriðja.
