Japanskt plötufyrirtæki stendur nú frammi fyrir mikilli gagnrýni eftir að hafa tilkynnt útgáfu á geisladiski með látinni söngkonu sem inniheldur nektarmyndir af henni sem voru teknar fyrir mörgum áratugum.
Fylkisstjórinn í Kumamoto í suðurhluta Japans, þar sem söngkonan Aki Yashiro var ættuð frá, fordæmdi ákvörðunina harðlega og kallaði hana „ófyrirgefanlega“ í bloggfærslu sem birt var á miðvikudaginn.
Geisladiskurinn á að koma út næsta mánudag, samkvæmt plötufyrirtækinu, sem greindi frá því að útgáfan muni innihalda tvær nektarmyndir af Yashiro sem „bónus“. Útgefandinn segir að myndirnar hafa verið teknar af fyrrverandi maka hennar þegar hún var á þrítugsaldri.
„Ef þetta er ekki hefndarklám, hvað er það þá?“ skrifaði fylkisstjórinn Takashi Kimura í bloggfærslu.
Makoto Ono, fulltrúi fyrirtækisins sem sér um vefsíðu Yashiro, hefur einnig fordæmt málið opinberlega. „Tilkynningin (um útgáfu nektarmyndanna) er afar ógeðfelld og algjörlega óásættanleg,“ sagði Ono í fréttatilkynningu fyrr í vikunni.
Fyrirtæki hans sendi bréf til plötufyrirtækisins í mars í gegnum lögmenn og krafðist þess að útgáfan yrði stöðvuð, en hafði ekki fengið svar, að sögn fyrirtækisins.
Plötufyrirtækið, sem er staðsett í Kagoshima-héraði, hefur sagt við japanska fjölmiðla að það eigi réttinn að myndunum. Notendur samfélagsmiðla í Japan hafa fordæmd fyrirtækið. „Nektarmyndir gefnar út án samþykkis eftir andlát... Svona má aldrei gerast,“ skrifaði einn notandi á samfélagsmiðlinum X.
Yashiro, sem steig fyrst fram á sjónarsviðið í Japan á áttunda áratugnum, var landsþekkt sem drottning enka-tónlistarinnar en hún lést árið 2023.
