Þrír einstaklingar hafa verið handteknir vegna gruns um ofbeldi og kynferðisbrot gegn yngri nemendum við sænskan skóla í Sigtúni, elsta bæ landsins.
Aftonbladet hefur áður greint frá því að þrír unglingspiltar séu taldir hafa orðið fyrir brotum í tengslum við vígsluathöfn fyrir svokallaða „trackers“ við Sigtuna-skólann í byrjun október.
Nú rannsakar lögregla hvort tveir nemendur til viðbótar hafi orðið fyrir brotum í tengslum við vígsluathöfn þar sem yngri nemendur eru sagðir hafa verið niðurlægðir og beittir ofbeldi.
Grunur leikur á að nokkrir yngri nemendur hafi verið neyddir til að afklæðast og síðan fengið högg á líkamann. Þeir sem sýndu mesta árásarhneigð eru sagðir hafa hulið andlit sín með hettum.
Lögregla rannsakar nú hvort tveir einstaklingar til viðbótar hafi orðið fyrir brotum í skólanum, samkvæmt gögnum frá héraðsdómi. Annar þeirra er undir lögaldri.
Þrír handteknir vegna málsins
Þrír einstaklingar hafa verið handteknir vegna málsins. Þeir eru meðal annars grunaðir um stórfellda líkamsárás og ólögmætar hótanir. Tveir þeirra eru einnig grunaðir um stórfellt kynferðisofbeldi.
Saksóknarinn Lisa dos Santos fer með rannsókn málsins. Hún hefur áður sagt að skipulagt valdakerfi innan skólans hafi átt þátt í atburðunum.
„Rannsóknin hefur leitt í ljós að innan skólans er valdakerfi og stigveldi með ákveðnum hlutverkum. Eldri nemendur gegna þar hlutverkum sem felast í að refsa yngri nemendum og hafa stjórn á þeim,“ segir hún.
