Glæsilegt 228,1 fermetra einbýlishús á rúmlega 3.000 fermetra lóð í Vaðlaheiði, gegnt Akureyri, er nú til sölu fyrir 179 milljónir króna. Eignin hefur verið á sölu síðan í vor en húsið var reist árið 2009.

Um er að ræða þriggja til fjögurra herbergja hús sem stendur á 3.180 fermetra gróinni eignarlóð. Húsið nýtur mikils útsýnis yfir til Akureyrar og er lóðin umlukin gróðri og trjám.

Í húsinu eru meðal annars tvö svefnherbergi, skrifstofa sem einnig má nýta sem svefnherbergi, baðherbergi, þvottahús og stórt opið rými þar sem eldhús og stofa renna saman. Úr alrýminu er útsýni yfir Eyjafjörð til Akureyrar og útgengt á verandir bæði til austurs og suðurs.

Bílskúr hússins er rúmgóður og þar hefur verið komið fyrir eldhúsinnréttingu. Inn af honum er jafnframt baðherbergi með sturtu og salerni. Samkvæmt fasteignaauglýsingu væri tiltölulega einfalt að stúka hluta bílskúrsins af og útbúa þar sérstaka leigueiningu.

Bak við húsið, inni í skógi á lóðinni, stendur lítið gestahús sem ekki er talið með í birtum fermetrum eignarinnar. Þar er herbergi með eldhúsinnréttingu og salerni auk geymslukjallara. Rafmagn og heitt og kalt vatn er í gestahúsinu og við það er steyptur pallur.

Þá er sérstakur geymsluskúr við aðalhúsið. Gólfhiti er í öllum rýmum aðalhússins, snjóbræðsla er í steyptu bílaplani og steyptar stéttir og verandir liggja umhverfis húsið.

Ásett verð eignarinnar er 179 milljónir króna.