Hljómsveitin Eldmóðir er ein virkasta rappsveit landsins en tvíeykið gaf út þrjár stuttskífur á síðasta ári. Þráinn Gunnlaugur Þorsteinsson og Óli Hrafn Jónasson skipa hljómsveitina og munu þeir félagar á morgun gefa út stuttskífuna Til kaldra kola á streymisveitunni Spotify en platan kom út í síðustu viku á Bandcamp.

Þráinn ætti að vera flestum kunnur sem hafa fylgst með íslenskri rapptónlist undanfarin 20 ár en hann gekk lengi undir nafninu Brisk og var meðal annars í hljómsveitinni Hinir Dæmalausu. Þráinn ræddi við Mannlíf um nýju stuttskífuna.

„Regluleg tíðni stuttskífa er að stórum hluta vegna þess að við hópum efnilegum lögum í fimm laga stuttskífu með einkennandi hljóðheim eða þema,“ sagði Þráinn um dugnaðinn í hljómsveitinni. „Sérkenni hverrar stuttskífu dregur fram sköpunarkraftinn og að takast á við fjölbreytt verkefni viðheldur drifkraftinum. Við höfum sjálfir háan standard í því sem við gefum út en oft erum við byrjaðir á næstu stuttskífu þegar núverandi verkefni er skilað inn í mixun og masteringu. Það má líka nefna að Óli Hrafn er óþreytandi vinnuþjarkur þegar kemur að pródúseringu fyrir sveitina.“

En hvað komst á óvart í ferlinu í þetta sinn?

„Það kom mér helst á óvart hvað síðasta stúdíó atrennan eða kaflabreyting á síðustu stundu getur breytt rosalega miklu. Þegar við fórum í lokarennsli yfir Föt eru glötuð II þá small það saman eins og púsluspil þegar gestaerindum og lagaköflum var raðað upp á annan máta. Þetta var svona aha móment, þetta er lagið!“

„Léttari og poppaðri hljómur er næst á dagskrá,“ sagði rapparinn knái þegar hann er spurður út í framtíðina. „Það er svona sköpunarlegur palate cleanser fyrir okkur eftir drungalegan hljóm á Til Kaldra kola. Við erum mjög stoltir af útgáfunni enda reynum við alltaf að vera nokkuð tilraunakenndir þegar færi gefst. Til dæmis er upphafslagið Lambhúshetta líkast til fyrsta íslenska rapp lagið í 7/8 takti og að auki var það sérstakt tækifæri fyrir okkur að fá rapphetjuna Kilo sem gestarappara á íslensku á plötunni sem er fáheyrt.“