Skáldsagan Huldukonan eftir Fríðu Ísberg er á leið á bandarískan bókamarkað eftir að virt forlag þar í landi tryggði sér útgáfuréttinn.

Bandaríska forlagið Riverhead Books, sem er hluti af Penguin Books, mun gefa bókina út vestanhafs. Riverhead gefur aðeins út takmarkaðan fjölda bóka á ári og vinnur með nokkrum af þekktustu höfundum heims, þar á meðal Hernan Díaz, Elizabeth Gilbert og Nóbelsverðlaunahöfunum Olgu Tokarczuk og Abdulrazak Gurnah.

Þetta er í fyrsta sinn sem skáldsaga eftir Fríðu kemur út í Bandaríkjunum. Huldukonan, sem kom út fyrir jólin, vakti mikla athygli hér á landi og hlaut Bóksalaverðlaunin sem skáldsaga ársins.

Bókin, sem fjallar um óvenjulega ástarsögu manns og huldukonu í afskekktum firði, hefur þegar verið seld til sextán málsvæða. Fyrsta bók höfundar, Merking, kom áður út víða í Evrópu og í Ástralíu með góðum árangri.

Huldukonan seldist upp í innbundinni útgáfu hérlendis og hefur nú verið gefin út aftur í kilju.