Tónlistarmaðurinn Daði Freyr hyggst gefa út nýja plötu, Too Much Not Enough, þann 8. maí næstkomandi og bendir á að aðeins 12 dagar séu í útgáfuna.

Í færslu á Facebook greinir Daði frá því að hann gefi plötuna út sjálfstætt, án aðkomu stórs útgáfufyrirtækis. Hann segir það bæði krefjandi og gefandi, þar sem hann hafi fulla stjórn á ferlinu og geti unnið verkið nákvæmlega eins og hann vill.

„Ég er svo stoltur af því hvernig þessi plata kom út, það er enginn vafi í mínum huga að þetta er besta verkið mitt hingað til,“ segir hann meðal annars í færslunni og bætir við að vinnan við efnislega útgáfu plötunnar hafi einnig skilað glæsilegum árangri.

Hann bendir þó á að sjálfstæð útgáfa þýði jafnframt að allur kostnaður falli á hann sjálfan, sem takmarki möguleika til markaðssetningar. Því skipti stuðningur aðdáenda miklu máli.

„Hvert like, deiling, athugasemd og fyrirfram pöntun hjálpar gríðarlega mikið,“ segir Daði og þakkar fylgjendum sínum fyrir stuðninginn. Hann segist jafnframt vera að reyna að rata í gegnum „algóritmann“ án þess að fórna list sinni eða sjálfsmynd.

Að lokum segir hann að hann sé rétt að byrja og lýsir þakklæti til þeirra sem gera honum kleift að starfa við tónlistina.