Baltasar Kormákur og Charlize Theron hyggjast aftur sameina krafta sína í nýrri kvikmynd, Six Clean Kills. Baltasar mun leikstýra myndinni en Theron fer með aðalhlutverkið.
Frá þessu greinir miðillinn Deadline.
Myndin byggir á óútgefinni skáldsögu eftir rithöfundinn Stan Parish, sem jafnframt skrifar handrit kvikmyndarinnar. Framleiðslan er í höndum Universal Pictures. Auk þess verða þau bæði meðal framleiðenda verkefnisins.
Baltasar og Theron unnu síðast saman að kvikmyndinni Apex, sem hefur notið mikilla vinsælda á Netflix frá því hún var frumsýnd 24. apríl. Samkvæmt Deadline fór myndin beint í efsta sæti yfir enskumælandi kvikmyndir á streymisveitunni og hélt þeirri stöðu í tvær vikur. Þá jókst áhorf jafnframt í annarri sýningarviku hennar.
Í umfjöllun Deadline kemur einnig fram að Theron hafi lengi haft áhuga á verkefninu Six Clean Kills. Hún og Baltasar hafi viljað vinna saman á ný eftir farsælt samstarf þeirra við gerð Apex.
