Ferguson lögmaður Sonju sver af sér Guðmund á Núpum: „Bæði undrandi og vonsvikinn með Gumma“

John J. Ferguson, banda­rískur lög­maður auð­kon­unnar heit­innar Sonju Zorilla, aðskilur sig alfarið frá við­skiptum Guð­mundar A. Birg­is­sonar, oft­ast kenndum við Núpa í Ölfusi, sem hefur játað á sig skatt­svik og pen­inga­þvætti. Lög­mað­ur­inn seg­ist bæði undr­andi og von­svik­inn að heyra af því hvernig er komið fyrir kollega sínum hjá minn­ing­ar­stjóði Sonju.

„Ég hef þekkt Gumma í 25 ár og veit að hann hefur verið í vand­ræðum vegna gjald­þrots. En ekk­ert af því teng­ist sjóðnum því ég einn hef hönd á öllum pen­ing­unum frá upp­hafi og hann hefur ekki haft nokkurn aðgang að þeim. Hvað sem hann hefur gert þá er alfarið engin pen­inga­teng­ing milli sjóðs­ins og hans per­sónu­legu mála,“ segir Ferguson.

Guð­mundur var umsvifa­mik­ill fjár­festir fyrir hrun. Hann átti meðal ann­ars hlut í Lífsval sem var eitt stærsta jarð­ar­fé­lag lands­ins. Það keypti á fimmta tug jarða víðs­vegar um landið, sauð­fjárbú, kúabú og réð auk þess yfir rúm­lega milljón lítra mjólk­ur­kvóta. Guð­mundur ját­aði sök fyrir dómi en hann var ákærður fyrir 300 millj­óna skila­svik og pen­inga­þvætti. Fjár­festir­inn var úrskurð­aður gjald­þrota í des­em­ber 2013. Guðmundi er gefið að sök að hafa haldið frá skipta­stjóra þrota­bús síns eignum sem hann átti á Spáni og í Banda­ríkj­unum og komið undan mál­verki. Hann hefur nú játað brot sín fyrir dómi.

Sjá nánar hér: Hulinn sjóður Sonju og meinst svika­slóð frænd­ans.

Guð­mundur A. Birg­is­son

Sonja Zorila hagn­að­ist vel á við­skiptum á Wall Street. Minn­ing­ar­sjóði hennar, Sonja Foundation, var ætlað að styrkja lang­veik börn á Íslandi og í Banda­ríkj­unum og hefur verið fjallað um að eignir Sonju um alda­mótin hafi verið um tíu millj­arðar króna. Lítið sem ekk­ert hefur enn feng­ist upp­gefið um sjóð­inn sem varð til við and­lát auð­kon­unnar og áttu allar eignir hennar, að und­an­skildum lágum upp­hæðum sem systra­börn hennar fengu, að renna í sjóð­inn.

Guð­mundur rækt­aði mjög sam­bandið við Sonju um ára­bil áður en hún lést og vann traust hennar. Sonja átti miklar eignir á Flórída og í New York. Þá átti hún íbúð á Ísland og sum­ar­hús á Núpum, land­ar­eign Guð­mundar. Auk þess átti hún Rolls Royce bif­reið sem geymd var á Núpum. Athygli­vert er að meint svika­slóð Guð­mundar liggur um sömu svæði og eigur auð­kon­unnar var að finna. Sonja átti veg­legt mál­verka­safn, íbúðir á Flórída og á Park Avenue í New York þar sem skatt­ur­inn hefur kom­ist á snoðir um leyndar eignir Guð­mundar.

Allt frá því Sonja lést hefur leynd­ar­hjúpur verið um eignir hennar og ekk­ert spurts til sjóðs­ins eða úthlut­ana úr honum. Guð­mundur hefur sjálfur farið undan í flæm­ingi þegar fjöl­miðlar hafa spurt um sjóð­inn eða afdrif eign­anna. Allt frá því Sonja lést árið 2002 er minn­ing­ar­sjóður hennar enn í sama myrkri og hann hefur verið und­an­farin 18 ár.

John J. Ferguson, lög­maður Sonju á sínum tíma og annar umsjón­ar­manna styrkt­ar­sjóðs Sonju.

Saman eru þeir Ferguson og Guð­mundur umsjón­ar­menn minn­ing­ar­sjóðs­ins. Aðspurður segir Ferguson að upp­runa­lega hafi verið í sjóðnum því sem nemur hálfum millj­arði króna og því hefur að mestu verið úthlutað til góð­gerð­ar­mála. Hann segir að mál­verk hafi verið seld á sínum tíma og sölu­and­virði þeirra verið meðal þess sem rann í sjóð­inn en að engar fast­eignir hafi runnið þangað inn. Mannlíf óskaði form­lega eftir yfir­liti frá sjóðnum um hvaða upp­hæðir og hvert þær hafi runnið úr sjóðnum frá stofnun. Ferguson neit­aði að afhenda þær upp­lýs­ingar. „Þetta eru trún­að­ar­upp­lýs­ingar og eru því ekki ætl­aðar til opin­berrar birt­ingar.“

Spurn­ing­unni um hvort ekki hafi verið and­virði 10 millj­arða til ráð­stöf­unar eftir lát Sonju svar­aði Ferguson því hlæj­andi. Honum var hins vegar aug­ljós­lega brugðið þegar Mannlíf sagði honum frá því að Guð­mundur hafi játað á sig skatt­svik og pen­inga­þvætti.

„Ég held að Sonja hafi aldrei átt svona mik­inn pen­ing en það mesta úr sjóðnum hefur verið úthlutað til góð­gerð­ar­mála í gegnum árin. Það er eitt­hvað eftir í sjóðnum. Hvað sem Gummi hefur gert af sér per­sónu­lega hefur ekk­ert að gera með dán­arbú Sonju eða sjóð­inn. Sjóð­ur­inn stendur fylli­lega í skilum við skatta­yf­ir­völd og er algjör­lega hreinn. Ég finn til með Gumma því hann kom mér ávallt fyrir sjónir sem sann­krist­inn maður og vin­gjarn­leg per­sóna. Því er ég bæði undr­andi og von­svik­inn. Frá per­sónu­legu sjón­ar­miði hef ég ekk­ert að gera með hann og hef ekki þekk­ingu á hvaðan pen­ingar hans komu,“ segir Ferguson.