Jóhann Páll Jóhannsson, umhverfis-, orku- og loftslagsráðherra, hefur staðfest fyrirkomulag rjúpnaveiða í ár. Veiðitímabilið hefst 23. október um land allt en lengd þess verður mismunandi eftir veiðisvæðum.
Heimilt verður að veiða rjúpu frá föstudögum til og með þriðjudögum. Á Austurlandi stendur tímabilið til 22. desember, á Norðausturlandi og Vesturlandi til 1. desember, á Vestfjörðum til 24. nóvember og á Norðvesturlandi og Suðurlandi til 17. nóvember.
Áfram verður sölubann á rjúpum og gildir það jafnt um sölu til endursöluaðila sem annarra.
Fyrirkomulag veiðanna byggir á þeirri nálgun sem mótuð var í samvinnu hagaðila við gerð stjórnunar- og verndaráætlunar fyrir rjúpnastofninn árið 2024.
Verndarsvæði verður jafnframt á Reykjanesi líkt og undanfarin ár. Veiðimenn eru hvattir til að kynna sér takmarkanir á friðlýstum svæðum og ganga vel um náttúru landsins.
