Danmörk gaf út í dag nýjar ráðleggingar fyrir fólk sem hyggur á að ferðast til Bandaríkjanna og ráðleggur trans- og kynsegin fólki að hafa samband við bandaríska sendiráðið áður en það leggur af stað.

„Ef þú ert með kyn X í vegabréfinu þínu, eða ef þú hefur breytt um kyn, er þér ráðlagt að hafa samband við bandaríska sendiráðið áður en þú ferð til að fá upplýsingar um hvað gildir fyrir þig,“ sagði danska utanríkisráðuneytið í yfirlýsingu til AFP.

Þessi ráðlegging var birt í bandarískri ferðaviðvörun á vefsíðu danska utanríkisráðuneytisins. Þýskaland gaf nýlega út svipaða ferðaviðvörun fyrir Bandaríkin.

Í innsetningarræðu sinni sagði Donald Trump Bandaríkjaforseti að stjórnvöld hans myndu aðeins viðurkenna tvö kyn: karl og konu.

Í ljósi afleiðinga sem þetta gæti haft fyrir ferðalanga ssegja samtökin LGBT+ Danmark að þau hefðu haft samband við danska utanríkisráðuneytið og beðið það um að breyta ferðaviðvöruninni fyrir Bandaríkin.

„Við höfum áhyggjur af því að fólk gæti verið stöðvað á flugvellinum og neitað um inngöngu, eða að eitthvað óviðeigandi og óþægilegt gæti átt sér stað á flugvellinum,“ sagði Susanne Branner Jespersen frá LGBT+ Danmark.

Síðan Trump sneri aftur í Hvíta húsið hefur hann beint spjótum sínum að trans fólki. Hann hefur undirritað tilskipanir sem banna trans íþróttafólki að keppa í kvennaíþróttum, útiloka trans fólk úr bandaríska hernum og takmarka kynleiðréttingaraðgerðir fyrir einstaklinga undir 19 ára aldri.

Samkvæmt danska utanríkisráðuneytinu hefur engum Dönum verið vísað frá landamærum Bandaríkjanna síðan Trump-stjórnin tók við í janúar.