Faðir hneig niður og lést á útför sonar síns þegar kista hans var borin inn í kapelluna.
Norman White, 61 árs frá Middlesbrough í Norður Jórvíkurskíri, var staddur við útför sonar síns, Davids Beilicki, í St. Bede’s Chapel við Teesside Crematorium þegar talið er að hann hafi fengið stærðarinnar hjartaáfall.
David, 41 árs, fannst látinn í sófa hjá ættingja eftir langvarandi baráttu við fíkniefni. Andlát hans bar að á sama degi og tíu ár voru liðin frá minningarathöfn sem haldin var fyrir tvíbura hans sem fæddust andvana.
Systir hans, Chantelle, sagði að David hefði verið hættur neyslu og verið á batavegi þegar hann lést. Hún lýsti atburðarrásinni sem endaði með dauða föður þeirra sem atriði úr harmrænni kvikmynd.
„Þetta var svo mikið áfall. Maður ímyndar sér aldrei að eitthvað svona geti gerst, þú gætir ekki skrifað þetta handrit,“ sagði Chantelle, fjögurra barna móðir, 42 ára.
Rannsókn á andláti Davids, sem varð 31. júlí, stendur enn yfir. Útför hans fór fram 21. ágúst. Chantelle sagði: „Þegar við komum inn í kapelluna og settumst niður leit ég í kringum mig og spurði: „Hvar er pabbi“?“
Kapellan var rýmd á meðan sjúkraflutningamenn voru kallaðir til. Norman var fluttur á sjúkrahús, með systur sinni í sjúkrabílnum, á meðan aðrir fjölskyldumeðlimir héldu áfram með athöfnina. Skömmu síðar bárust þeim harmþrungin tíðindi um að Norman, sem var sjö barna faðir, hefði látist.
Chantelle sagði að fráfall föður hennar hefði verið algjört áfall fyrir fjölskylduna og hún eigi erfitt með að takast á við missinn. Hún bætti við að Norman hefði aldrei áður glímt við hjartasjúkdóma: „Ég held að hann hafi dáið úr harmi. Að sjá alla fjölskylduna saman svona var of mikið fyrir hann.“
Hún lýsti því að í viku eftir útför Davids hafi hún verið í algjöru áfalli og átt í erfiðleikum með að skilja hvað hefði gerst. Þrátt fyrir baráttu Davids við fíkn hafi hann verið elskaður af öllum sem þekktu hann. Hann var faðir tveggja drengja, hins fullorðna Ethans og níu ára gamla Jaxon.
„Hjarta hans var eins stórt og hafið. Hans er svo sárt saknað,“ sagði hún.
David bjó hjá Chantelle og fjölskyldu hennar á Overdale Road í Park End. Hún sagði að börnin sín væru niðurbrotin: „Heimilið er ekki hið sama án hans.“
Norman hafði mikla ástríðu fyrir hnefaleikum og var þjálfari í þeirri íþrótt. Hann var afar hógvær maður, en þekktur og vinsæll í samfélaginu. „Hann var pabbi minn og ég dáði hann,“ sagði Chantelle.
Að lokum þakkaði hún starfsfólki Rose Funerals
„Þau voru einstök allan þennan harmræna dag. Við hefðum ekki komist í gegnum hann án þeirra. Þau sýndu þolinmæði, umhyggju og lifðu með okkur gegnum hvert einasta augnablik, allt á meðan þau reyndu að bjarga pabba, þó þau væru sjálf í áfalli.“
Komment