Drífa Snædal, talskona Stígamóta, segir að nýfallinn dómur Landsréttar í máli gegn knattspyrnumanninum Albert Guðmundssyni sýni skýrt hvers vegna brotaþolar kynferðisbrota kjósa yfirleitt ekki að leita réttlætis í dómskerfinu. Þetta kemur fram í pistli hennar á Vísi í morgun.

Hún segir dóma bæði í héraði og Landsrétti bera merki „drusluskömmunar og annars stigs ofbeldis gagnvart brotaþolum.“ Dómurinn í Landsrétti var þríklofinn og telur hún að hlutdrægni í málinu endurspeglist í áliti sumra dómara.

Drífa bendir á að dómararnir hafi þó verið sammála um að héraðsdómur hafi notað rangt orðalag. „Allir þrír dómarar Landsréttar eru hins vegar sammála um að gera athugasemdir í garð héraðsdómsins um orðalag í dómnum sem talar ítrekað um “ætlaðan brotaþola“ sem er í meira lagi gildishlaðið og ekki rétt skv. lögum.“

Hún gagnrýnir einnig áherslur dómanna: „Þá er undirliggjandi stef í dómunum hvernig brotaþoli hagaði sér fyrir brotið… Þá er meira að segja fjallað um hvernig hún var klædd og hvað hún var að gefa í skyn með klæðnaði.“

Aðeins um 10% brotaþola sem leita til Stígamóta reyna að fara í gegnum réttarkerfið. „Eftir nýfallinn dóm má spyrja, af hverju ættu brotaþolar að reyna það yfir höfuð?“ spyr hún og segir kerfið „véfengja, drusluskamma“ og gera lítið úr afleiðingum brota.

Drífa fjallar einnig um hvernig brotaþolar leiti í auknum mæli í opinbera umræðu til að fá réttlæti, en það sé kallað „slaufunarmenning“. „Brotaþolum allra tíma hefur hingað til verið slaufað… Þegar kastljósinu er beint að gerendum er slaufun hins vegar orðinn að alvarlegasta glæp sem um getur.“

Hún ber saman dóm Alberts við annan dóm sama dag þar sem maður af arabískum uppruna var sakfelldur: „Áhugavert er að bera saman málin og velta því fyrir sér hvort Landsréttur hefði þríklofnað… ef ekki hefði verið um að ræða þekktan íslenskan landsliðsmann.“

Drífa segir að kerfið þrýsti brotaþolum til þagnar á meðan gerendur haldi áfram án afleiðinga. „Eitt er víst að það er ekki hægt að hvetja brotaþola til að fara í gegnum réttarkerfi sem sýnir þeim engan skilning og ítrekar ofbeldið.“