Síðustu daga hafa bæði dag- og næturvaktir hjá slökkviliði Fjarðabyggðar verið eingöngu skipaðar konum. Slíkt er óvenjulegt, en hlutur kvenna innan liðsins hefur aukist jafnt og þétt á undanförnum árum. Einn slökkviliðsmaður segir fjölbreytni skipta miklu máli fyrir starfið. Þetta kemur fram í frétt Austurfréttar.

Venjulega eru þrjár konur fastráðnar í slökkviliðinu, en í sumar bættust fjórar tímabundið við. Í júlí hafa vaktir raðast þannig að stundum hefur dagvakt kvenna afhent kvennavakt á nóttu og tekið síðan við henni aftur morguninn eftir. Á hverri vakt eru þrír til fjórir starfsmenn.

Þannig voru bæði vaktaskiptin í gærkvöldi og í morgun alfarið með konum. „Þetta er ekki alvanalegt í slökkviliði. Það eru margir í sumarfríum þessa dagana og þess vegna raðast vaktirnar svona upp. Almennt eru þær blandaðar,“ segir Stefanía Óskarsdóttir, slökkviliðs- og sjúkraflutningamaður í samtali við Austurfrétt.

„Gott að hafa þetta blandað“

Slökkviliðs- og sjúkraflutningastörf hafa lengi verið karllæg. Í Fjarðabyggð, þar sem slökkviliðið sér einnig um sjúkraflutninga, hefur konum þó fjölgað á síðustu árum. „Við vorum tvær sem byrjuðum um svipað leyti árið 2022 í aðalstöðinni á Hrauni. Þá voru þrjár fyrir. Konurnar eru fleiri ef útstöðvarnar eru taldar með og hefur farið fjölgandi.

Ég kann enga sérstaka skýringu á þessu en tímarnir hafa auðvitað breyst. Konurnar hafa kannski farið að sjá að þær geta sinnt þessum störfum á jafn við karlana. Við þurfum öll að standast sömu kröfurnar, til dæmis sama þrekprófið.

Að mínu mati er gott að hafa þetta blandað, þar sem verkefnin eru jafn misjöfn og þau eru mörg. Það er gott að geta nýtt styrkleika beggja kynja í slökkvistarfi og í sjúkraflutningum,“ segir Stefanía.

Sjúkraflutningar meginverkefnið

Stefanía segir ekki mikinn mun á menningunni innan vaktarinnar eftir kyni. „Þetta eru allt mismunandi persónuleikar, sama af hvaða kyni þeir eru.“

Um helgina breytist skipulagið þegar dagvaktin verður að næturvakt og karlmaður bætist í hópinn. Hún bendir einnig á að auk aðalvaktanna sé alltaf stjórnandi á bakvakt og starfsfólk á frívöktum eða í útstöðvum geti brugðist við ef stærri verkefni koma upp.

Vaktir síðustu daga hafa verið tiltölulega rólegar. „Nóttin var róleg, síðan var einn sjúkraflutningur í morgun til Norðfjarðar í veg fyrir sjúkraflug. Verkefnin okkar síðustu daga hafa mest snúist um sjúkraflutninga,“ segir Stefanía.