Fyrir 155 þúsund krónur á nóttina býðst nú að sofa ofan á jökullóni hér á Íslandi. Eigandi gistirýmisins segir það hvergi í boði annars staðar.

„Þetta er einstakt á heimsvísu,“ segir Steinþór Arnarson, framkvæmdastjóri og stofnandi Fjallsárlóns ehf, í samtali við Mannlíf.

Hann segir að gistingin kalli á töluvert tilstand. „Það kostar 155 þúsund krónur en inni í því er líka ferðin um lónið á bát þar til lent er á næturstað. Létt máltíð og morgunmatur innifalið.“

Gistingin á sér stað í smáhýsi sem flýtur á fleka, en sambærileg hús eru töluvert notuð í Finnlandi, ásamt Noregi og Svíþjóð. En þó ekki ofan á yfirborði jökullóns.

Utanumhaldið er sem fyrr segir meira en að segja það. „Gestirnir hæstánægðir en þetta er allt mikið tilstand. Þrif og viðhald kallar á að sigla á staðinn á zodiac,“ segir Steinþór.

Ekki aðeins þau fjársterkustu nýta sér gistinguna, að sögn staðarhaldara.

„Það er reyndar fjölbreyttur hópur sem hefur verið að gista og sumir skipuleggja þetta sem einn af hápunktunum í ferðinni,“ segir Steinþór.